دوشنبه ۱۱ اسد ۱۴۰۰، ۰۵:۵۴ پیش از چاشت به وقت محلی کابل

حمایت تاجیکستان از نظام جمهوری اسلامی و رهبری دولت افغانستان در روند صلح

||| ||| |||

کابل – محمد حنیف اتمر سرپرست وزارت امور خارجه جمهوری اسلامی افغانستان صبح امروز، با آقای سراج الدین مهرالدین وزیر امور خارجه جمهوری تاجیکستان از طریق تیلفون صحبت و تبادل نظر کرد.

آقای اتمر با قدردانی از حمایت جمهوری تاجیکستان از موقف جمهوری اسلامی افغانستان در روند صلح و آمادگی آن کشور برای میزبانی از نشست وزرای امور خارجه پروسه استانبول- قلب آسیا، اظهار داشت، جمهوری اسلامی افغانستان بر گسترش و تقویت هر چه بیشتر روابط میان دو کشور دوست و برادر باورمند بوده و برای تحقق این هدف از هیچ نوع تلاش دریغ نخواهد کرد.

سپس وزیر امور خارجه تاجیکستان، با تأکید بر حمایت آن کشور از موقف افغانستان در روند صلح به رهبری دولت جمهوری اسلامی افغانستان، حفظ نظام جمهوری اسلامی و دستآورد های ۱۹ سال پسین اطمینان داده، ابراز امیدواری کرد که جنگ و بحران طولانی در افغانستان با تلاش‌های مشترک دولت و مردم افغانستان و همکاری صادقانه کشور های منطقه و جهان پایان یابد.

وزرای خارجه دو کشور با تأکید بر اشتراکات و پیوندهای عمیق دینی، فرهنگی و تاریخی میان افغانستان و تاجیکستان، در مورد نشست های دوجانبه و چندجانبه به شمول نشست وزیران خارجه پروسه استانبول- قلب آسیا که قرار است در آینده نزدیک به میزبانی تاجیکستان برگزار گردد و موضوعات مهم دیگر، از جمله امکان افزایش صادرات برق از تاجیکستان به افغانستان بحث و تبادل نظر کردند. هردو جانب توافق به عمل آوردند تا به هدف تقویت هرچه بیشتر همکاری ها رؤسای جمهور دو کشور در آینده نزدیک طی تماس تلیفونی با هم صحبت خواهند کرد.

 
 
 
خواندن 473 دفعه

آخرین ویرایش در پنج شنبه, 30/05/1399

بالا صفحه