د بهرنیو چارو وزارت

د افغانستان اسلامي جمهوریت د بهرنیو چارو وزیر جلالتماب محمد حنیف اتمر ژوند لیک

ښاغلی محمد حنیف اتمر د افغانستان په ختیځ لغمان ولایت کې زیږیدلی چې د افغانستان له مخکښو سیاستوالو او رهبرانو څخه دی. نوموړي د طالبانو له رژیم وروسته بیا تر دې مهاله خورا مهم او ټاکونکي دولتي ماموریتونه تر سره او بریالي کړي دي. له ۱۳۹۳ څخه تر ۱۳۹۷ پورې د ملي امنیت شورا د سلاکار، له ۱۳۸۷ څخه تر ۱۳۸۸ د کورنیو چارو وزیر، له ۱۳۸۵ تر ۱۳۸۷ د پوهنې وزیر او له ۱۳۸۱ تر  ۱۳۸۵ کال پورې د کلیو پراختیا او بیا رغاونې د وزیر په توګه د ښاغلي اتمر مهم دولتي ماموریتونه شمیرل کیږي. نوموړي د خپل ماموریتونو په دوره کې د پراخو اصلاحاتو او د پام وړ عامه خدمتونو په وړاندې کولو سره مهم دولتي بنسټونه فعال او د اعتماد جوګه کړل.

ښاغلی اتمر د روان کال د وري په میاشت کې د بهرنیو چارو وزارت د نوماند او سرپرست وزیر په توګه په وټاکل شو او د همدې کال د قوس په میاشت کې یې له ولسي جرګې څخه په لوړه شمیره د اعتماد رایه ترلاسه کړه. ښاغلی اتمر هوډ لري ترڅو د بهرنیو چارو وزارت د پخوانیو رهبریو د پرمختګونو په دوام د هېواد د دیپلوماسۍ دستګاه ته په سیمه ییزه او نړۍواله کچه د یوه سیال ارګان په توګه وده ورکړي.

د ولسمشر جلالتماب محمد اشرف غني د ملي امنیت د سلاکار په توګه، ښاغلي اتمر د ملي امنیت شورا په دفتر کې پراخ اصلاحات رامنځته کړل ترڅو د ادارو ترمنځ د پالیسۍ د جوړښت او انسجام چارې پیاوړې او اغیزمنې شي. یاد اصلاحات د ملي امنیت په مسائیلو کې د غوره پریکړو او د هغې د عملي کولو لامل شول. ښاغلي اتمر د افغانستان د ملي امنیتي او دفاعي ځواکونود  پیاوړتیا لپاره د حکومت د هڅو مشري وکړه، د افغان ځواکونو پیاوړی حالت د نوموړي له مهمو لاسته راوړنوڅخه شمیرل کیږي. ښاغلي اتمر د امنیت د ټینګښت او تروریزم پروړاندې د مبارزې په چارو کې سیمه ییزو همکاریو ته وده ورکړه او په دې برخه کې یې د هېوادونو پاملرنه زیاته کړه. ښاغلي اتمر د ملي امنیت د سلاکار په توګه د افغان حکومت او د حزب اسلامي افغانستان ترمینځ د مذاکراتو بهیر مدیریت کړ او د سولې د بریالي هوکړه لیک د لاسلیک له پاره یې لار هواره کړه.

 د کورنیو چارو د وزیر په توګه، ښاغلي اتمر د افغانستان د ملي پولیسو په لیکو کې د انسجام، د قانون د تنفیذ او د عامه نظم د ساتنې په موخه پراخ اصلاحات پلان او پلي کړل. د پوهنې په وزارت کې، ښاغلي اتمر د افغانستان د پوهنې ملي ستراتیژیک پلان په لاره واچاوه چې په ټول هیواد کې یې د زده کړو کیفت پورته او تعلیم ته یې د لاس سري چارې په ځانګړي توګه د نجونو او میرمنو له پاره آسانه کړې. د کلیو د پراختیا د وزیر په توګه، ښاغلي اتمر د ملي پیوستون برنامه ډیزاین او پلي کړه. یاده برنامه دافغانستان په تاریخ کې د عامه پانګوونې ترټولو لوی نوښت شمیر کیږي، چې په کلیوالي سیمو کې د بیوزلۍ پر کمولو تمرکز کوي.

 په عین وخت کې ښاغلي اتمر د ولسمشر کرزي په مشرۍ د ولسمشرۍ د نظارت د کمیټې د غړي په توګه دنده ترسره کوله، د دې کمیټې د غړیتوب پر مهال نوموړي په ۱۳۸۶ او ۱۳۸۷ کلونو کې د افغانستان د ملي پرمختیا د لومړۍ ستراتیژۍ په جوړولو کې کلیدي رول تر سره کړ.

سربیره پردې، ښاغلي اتمر د افغانستان په نویو او معاصرو سیاسي جریانونو کې فعاله رول لوبولی. هغه په افغان دولت او سیاست کې د نوي نسل تکنوکراتو مشرانو ته د حضور زمېنه برابره کړه او د دې ترڅنګ یې په ۱۳۸۹ کال کې د حق او عدالت په نوم نوی سیاسي ګوند تاسیس کړ. ښاغلي اتمر په ۱۳۹۸ کال کې په ولسمشریزو ټاکنو کې د ګډون په موخه د افغانستان په ګوټ ګوټ کې له قوت څخه ډک کمپاین تر سره کړ، خو د سولې پر بهیر د تمرکز له امله چې د ولس هیلې یې را ژوندۍ کړي دي په وروستۍ مرحله کې له ټاکنیزو سیالو څخه ځان ګوښه کړ.
د۱۳۶۹ یمو کلونو پر مهال ښاغلي اتمر په افغانستان کې د مرستندویه کارمند په توګه دنده تر سره کوله او په همدې موده کې یې له بیلابیلو ملي او نړۍوالو غیر دولتي سازمانونو او بنسټونو سره مهم ماموریتونه درلودل. په افغانستان کې له ټولنې او وګړو سره د کارکولو تجربه با ارزښته رول لري.

ښاغلی اتمر د لندن له یارک پوهنتون څخه د عامه پالیسۍ او له جګړې وروسته پرمختیایي زده کړو کې د ماسټرۍ سند لري، نوموړي په افغانستان کې د بشري مرستو د نقش په اړه مختلف علمي اثار خپاره کړي دي.

ښاغلي اتمر واده کړی او دوه ماشومان لري نوموړی په دري ، پښتو او انګلیسي ژبو خبرې کوي.