سه شنبه ۱۷ سرطان ۱۳۹۹، ۱۰:۱۷ پیش از چاشت به وقت محلی کابل
وروستي خبرونه

وروستي خبرونه (408)

د افغانستان د سولې لپاره د اجماع پیاوړتیا سیمه ییز کنفرانس جوړیدل

کابل – د افغانستان "د سولې لپاره د اجماع پیاوړتیا" تر نامه لاندې سیمه ییز کنفرانس د افغانستان د اسلامي جمهوري دولت په نوښت او د ګاونډیو هیوادونو او سیمې د استازو په ګډون د ویډیویي اړیکې په بڼه، په کابل کې جوړ شو.

جلالتمآب محمد اشرف غني، د افغانستان اسلامي جمهوریت جمهور رئیس د کنفرانس د پرانیستې ویناوال و او ښاغلی محمد حنیف اتمر د افغانستان اسلامي جمهوریت د بهرنیو چارو وزارت سرپرست وزیر د کنفرانس مشري او مدیریت وکړه. د کنفرانس د پای وینا د افغانستان د اسلامي جمهوریت د ملي پخلاینې عالي شورا رئیس جناب ډاکټر عبدالله عبدالله وړاندې کړه.

په دې کنفرانس کې د ۲۰ هیوادونو او نړیوالو سازمانونو استازو او لوړ رتبه ډیپلوماټانو برخه اخیستې وه چې د خپلو څرګندونو د وړاندې کولو پر مهال یې په ښکاره ډول د افغانانو په مالکیت او مشرۍ د سولې بهیر په اجماع څرګنده کړه.

د غونډې ګډون والو د سولې پروسې په اړه د وروستيو پرمختګونو په ځانګړې توګه د طالبانو له لوري د تاوتریخوالي په کچې کې د پام وړ کمښت راوستل، د طالبانو او افغان حکومت ترمینځ د بندیانو خلاصون، د بین الافغاني خبرو پیل او په افغانستان کې د کورونا ویروس سره د مبارزې لپاره د کمپاین پراخولو په موخه بشري اوربند په هکله په ټینګار سره خبرې وکړې.

د کنفرانس برخه والو، د تاوتریخوالي لوړې کچې په اړه د ملګرو ملتونو د امنیت شورا راپور او د اسلامي همکاریو سازمان د سرمنشي اعلامیې ته په اشارې سره، له طالبانو وغوښتل چې په تاوتریخوالي کې د پام وړ کمی راولي، تر څو ژر تر ژره د سولې خبرو پیل لپاره فرصت برابر سي.

د غونډې ګډون والو یو ځل بیا، د افغانانو په مالکیت او مشرۍ د سولې پروسې ملاتړ وکړ او په تیرو دوه لسیزو کې د افغانستان د خلکو او نړیوالې ټولنې د ګډو ارزښتونو او لاسته راوړنو د ساتنې غوښتنه وکړه.

د بهرنیو چارو سرپرست وزیر او په افغانستان کې د بریتانیا د سفیرې تر منځ ټیلیفوني اړیکه

کابل – د افغانستان بهرنیو چارو سرپرست وزیر ښاغلي محمد حنیف اتمر په افغانستان کې د بریتانیا له سفیرې اغلې الیسون بلیک سره د ټیلیفوني اړیکې په ترڅ کې خبرې وکړې.

په پیل کې، دواړو لوریو د کویید ۱۹ ناروغۍ نړیوالې تجربې په اړه خپل نظریات شریک کړل او په افغانستان او انګلستان هېوادونو یې د دې ناروغۍ د ناوړه اغیزو په هکله خبرې وکړې. 

د بحث اصلي موضوع د افغانستان د سولې بهیر وه. دواړو لوریو د سولې په بهیر کې وروستي بدلونونو او پرمختګونو په هکله په خاصه توګه د تاوتریخوالي د کچې د زیاتوالي په اړه اندیښنې، د تاوتریخوالي پر کمولو د څارنې لپاره اړین میکانیزمونه، د افغان دولت او طالبانو لخوا د بندیانو خوشې کولو او د بین الافغاني خبرو د پیل پر اهمیت او ارزښت د نظرونو تبادله وکړه.

ښاغلي اتمر او سفیرې اغلې بلیک همدارنګه د سیمه ییزې او نړیوالې ټولنې ګ‌‌‌‌‌‌ډو هڅو پر اهمیت او د افغانستان د سولې په بهیر کې د اجماع پر راوستلو باندې هم خبرې وکړې.

په پای کې، د بریتانیا سفیرې یو ځل بیا د افغانانو په مالکیت او مشرۍ د سولې بهیر لپاره د بریتانیا د دولت پر ملاتړ ټینګار وکړ.

د بهرنیو چارو وزارت د قونسلي چارو ریاست او افغان پسُت دولتي شرکت تر منځ د همکارۍ د هوکړه لیک لاسلیکول

کابل – د افغان وګړو لپاره د قونسلي خدمتونو د رسولو په برخه کې د اړینو اسانتیاوو برابرولو، د مصدقه اسنادو د خدمتونو د وړاندې کولو د کچې لوړولو، او په خپل وخت سره د خدمتونو د ترسره کولو په موخه، د بهرنیو چارو وزارت د قونسلي چارو ریاست او د افغان پُست دولتي شرکت تر منځ د همکارۍ د هوکړه لیک لاسلیک شو.

د دې هوکړه لیک پر بنسټ، د وګړو مصدقه اسناد چې د بهرنیو چارو وزارت قونسلي چارو ریاست تصدیق ته اړتیا ولري، په کابل ښار کې به د پُستي شرکت د پنځلس پُست خونو او په هغو ۸ ښارونو کې چې د بهرنیو چارو وزارت نمایندګۍ فعالیت لري، د هرات، نیمروز، کندهار، کندز، بلخ، بدخشان، پکتیا او ننګرهار ولایتونو په ګډون، د تصدیق خدمتونو او د اسنادو د لیږد او ویشلو، اته پُسټ خونو له لارې د ۱۳۹۹ل کال د سرطان میاستې په ۱۵مه نېټه په کار پیل وکړي.

د افغانستان او ترکمنستان د بهرنیو چارو وزیرانو ټیلیفوني اړیکه

کابل – ښاغلي محمد حنیف اتمر، د افغانستان د اسلامي جمهوریت د بهرنیو چارو وزارت سرپرست د ترکمنستان له بهرنیو چارو وزیر ښاغلي رشید مرادوف سره ټیلیفوني اړیکې له لارې خبرې وکړې.

په پېل کې، ښاغلي اتمر د کرونا ویروس ناروغۍ د خپریدو په دوران کې د افغانستان له خلکو او دولت سره د ترکمنستان دوست او ګاونډي هېواد بشردوستانه مرستو کولو له امله د زړه له کومې مننه وکړه.

وروسته، دواړو لوریو د افغانستان، آذربایجان او ترکمنستان د ولسمشرانو نننۍ درې اړخیزې ویډیویي غونډې په اړه د خپلو یادښتونه د تبادلې تر څنګ، د دریواړو هېوادونو د ولسمشرانو په وسیله د مطرح شویو وړاندیزونو او د هغو د تطبیقولو په تړاو مفصلې خبرې وکړې.

د خبرو په ادامه کې، دواړو اړخونو د سیاسي او اقتصادي دوه اړخیزو اړیکو د لا ډیرې پیاوړتیا او پراختیا، د سولې او بین الافغاني خبرو پیل، د افغانستان د سولې پروسې په هکله د ګاونډیو هېوادونو او د سیمه ییزې اجماع پر ون‌‌‌‌‌‌ډه او همدارنګه د ټاپي پروژې د پلي کیدو په اړه د غونډو د جوړیدو په اړه خبرې وکړې.

د PS752 الوتکې د پیښې د قربانیانو کورنیو ته د ځواب ورکولو او همغږۍ د نړیوالې ډلې د غړیو تر منځ د همکارۍ د هوکړه لیک لاسلیک

کابل –  د PS752 اوکرایني الوتکې د پیښې د قربانیانو کورنیو ته د ځواب ورکولو او همغږۍ د نړیوالې ډلې غړیو هېوادونو د بهرنیو چارو وزیرانو، چې افغانستان، انګلستان، کاناډا، اوکراین او سویډن پکې ګډون لري، د زیانمنو کورنیو ‌په ملاتړ، هغوی ته د تاوان ورکولو او د دغې پېښې د لاملونو د رڼو او بشپړو څېړنو د ترسره کولو په موخه، د ایران اسلامي جمهوري دولت سره د مذاکراتو په موخه د همکارۍ هوکړه لیک لاسلیک کړ. 

 د دې ډلې د بهرنیو چارو وزیرانو د هوکړه لیک پر لاسلیک کولو سره، یو وار بیا غوښتنه وکړه تر څو د دې غمجنې پیښې لاملونه، څې په نتیجه کې  ۱۷۶ تنو د افغان وګړو په شمول ژوند له لاسه ورکړ په کره توګه وڅیړل سي او ټینګار یې وکړ ترڅو  د متضررو کورنیو ته غرامت ورکړي.   

د بهرنیو چارو په وزارت کې د مشورتي غونډې جوړ یدل

کابل – د افغانستان اسلامي جمهوریت د بهرنیو چارو وزارت “د هېواد د ډیپلوماسۍ دستګاه پیاوړتیا او د بهرني سیاست بډای کول” تر سرلیک لاندې د مشورتي غونډې کوربه و چې د یو شمېر پخوانیو معینانو، سفیرانو او ډیپلوماټانو په ګډون د هېواد د بهرنیو چارو وزارت سرپرست وزیر ښاغلي محمد حنیف اتمر په حضور او مشرۍ سره د یاد وزارت د تشریفاتو په تالار کې جوړه شوه.

دغه نوښت چې د بهرني سیاست او د هېواد د ډیپلوماسۍ دستګاه د پیاوړتیا په موخه جوړ شوی و، د بهرنیو چارو وزارت د سرپرست وزیر ښاغلي محمد حنیف اتمر په وینا پیل او د ګډون والو د نظرونو، وړاندیزونو او سپارښتنو په څرګندولو سره دوام وکړ.

په دې غونډه کې د افغانستان د بهرني سیاست د لومړیتوبونو په اړه ګټورې او اغېزناکې ویناوې او خبرې وشوې او د هېواد د بهرنیو اړیکو د پیاوړتیا او پراختیا پر ارزښت او اهمیت ټینګار وشو.

وروسته، د افغانستان د اساسي قانون په چوکاټ کې د هېواد د ډیپلوماسۍ دستګاه کړنې او د بهرني سیاست د موقعیت روښانه کول تر ارزونې او بحث لاندې ونیول شول او د هغه پر لا ډیر اهمېت او ارزښت باندې ټینګار وشو.

په پای کې، د افغانستان د اسلامي جمهوري دولت په محوریت سره د سولې د بهیر په تړاو، د سیمه ییزې اجماع په جوړولو کې د هېواد د بهرنیو چارو وزارت کړنلاره د تایید او ټینګار وړ وګرځیده.  

په دې ناسته کې د بهرنیو چارو وزیر له ګډون والو سره د نظرونو تبادلې تر څنګ، هغه د چارواکو، ډیپلوماټانو او د همدې وزارت د پخوانیو کارکوونکو له خدمت، کار او هلو ځلو څخه یادونه وکړه او د ګټورو خدمتونو په اړه چې د هېواد ډیپلوماسۍ دستګاه په چوکاټ کې یې تر سره کړي دي،  په ډیر درنښت سره ستاینه او مننه وکړه.

ښاغلي اتمر وویل چې د وزارت په اوږدمهاله پروګرامونو، تګلارو او کړنلارو کې به د هېواد ډیپلوماټانو له نظرونو او وړاندیزونو څخه اعظمي ګټه واخلي.

په کابل کې د هند له سفیر سره د بهرنیو چارو سرپرست وزیر لېدنه

کابل – بهرنیو چارو وزارت سرپرست وزیر ښاغلي محمد حنیف اتمر، نن له غرمې وروسته په کابل کې د هند له سفیر ښاغلي ویني کمار سره لیدنه وکړه.

په پېل کې، ښاغلي اتمر د ملګرو ملتونو د سازمان د امنیت په شورا کې د غیر دایمي غړي په توګه د هند جمهوریت ټاکنې له امله هغه ته مبارکي وویله او په هغه سازمان کې یې د دواړو هېوادونو تر منځ پر نږدې همکاریو ټینګار وکړ.

دواړو لوریو د سولې بهیر او دوه اړخیزه اړیکو د لا ډیرې پیاوړتیا په اړه خبرې وکړې او نظرونه یې سره شریک کړل.

د کتنې په پای کې، ښاغلي کمار د افغانستان په مالکیت او مشرۍ د سولې له بهیر څخه د هند جمهوریت له دوامداره ملاتړ پر دوام، د افغانستان بهرنیو چارو وزیر ته ډاډ ورکړ.

د افغانستان او سویس د بهرنیو چارو وزیرانو ټیلیفوني اړیکه

کابل – د بهرنیو چارو محترم سرپرست وزیر، ښاغلي محمد حنیف اتمر د سویس د فډرالي شورا غړي او د بهرنیو چارو وزیر ښاغلي ایګنازیو کاسیس سره د سیاسي، پراختیایي او بشردوستانه همکاریو په ګډون پر دوه اړخیزه موضوعاتو باندې ټیلیفوني خبرې وکړې.

په سر کې، ښاغلي اتمر د افغانستان په اړه د دوست هېواد سویس د دوامداره ملاتړ، مرستو او همکاریو څخه مننه وکړه. وروسته دواړو اړخونو  د ژنیو کنفرانس د جوړولو په هکله د نړیوالې ټولنې د ژمنو د دوام او اړینو آماده ګیو په اړه چې په پام کې ده د روان میلادي کال په ترڅ کې د افغانستان د تمویل کوونکو هېوادونو د مشرانو په ګډون د سویس د ژنیو په ښار کې جوړ شي، بحث او خبرې وکړې.

دواړو لوریو، د افغانستان د سولې د بهیر او د دواړو هېوادونو تر منځ د دوه اړخیزه اړیکو د پیاوړتیا او پراختیا د څرنګوالي په تړاو هم خبرې وکړې او خپل نظرونه یې سره شریک کړل.

په پای کې، د سویس د بهرنیو چارو وزیر د دوه اړخیزه هوکړه لیکونو او نړیوالو ژمنو په چوکاټ کې د هغه هېواد د ژمنو او همکاریو، د خوړو د خوندیتوب او په افغانستان کې د سولې له بهیر څخه د ملاتړ پر دوام، ښاغلي اتمر ته ډاډ ورکړ.

د افغانستان د سوداګرۍ او صنایعو خونې له استازو سره د بهرنیو چارو وزارت د اقتصادي همکاریو د مرستیال غونډه

کابل - ښاغلي میرویس ناب، د بهرنیو چارو وزارت د اقتصادي همکاریو مرستیال د افغانستان د سوداګرۍ او صنایعو خونې له استازو سره لیدنه وکړه.

په دې لیدنه کې، لومړۍ ښاغلي ناب د ایران اسلامي جمهوریت ته د خپل وروستي سفر د پایلو په اړه خبرې وکړې او د دې سفر د خبرو اړینه برخه یې سوداګریز او اقتصادي موضوعات وبلل چې د هغه هېواد له مقاماتو سره یې شریک او پرې بحث کړی وو.

د لیدنې په دوام، ښاغلي ناب، ایران ته د سفر په جریان کې د خبرو جزئیات د هېواد د سوداګرۍ او صنایعو خونې له استازو سره په تفصیلي توګه بحث وکړ.

وروسته، د افغانستان د سوداګرۍ او صنایع خونې استازو د ټرانزیټ، د ویزې تر لاسه کولو، د پاسپورټ تمدیدولو په شمول د یو لړ موضوعاتو او ستونزو په اړه چې په داخل او بهر کې افغان سوداګر ور سره مخامخ دي، اشاره وکړه او د حل لپاره یې د همکارۍ غوښتنه وکړه.

په پای کې، ښاغلي ناب د یادو ستونزو د غوره حل په موخه، د درې کاري کمیسیونونو د جوړیدو په اړه خبرې وکړې او زیاته یې کړه: “له پاکستان سره د ستونزو د حل کمیسیون، د ایران سره د ستونزو د حل کمیسیون، او د چین د خلکو جمهوریت او د منځنۍ آسیا په هېوادونو کې د افغان سوداګرو د ستونزو د حل کمیسیون جوړ سي، تر څو له دې لارې یادې ستونزې په بنسټیز او غوره ډول حل او مطلوبه پایلې تر لاسه شي.”

د افغانستان او آذربایجان د بهرنیو چارو وزیرانو ټيليفوني اړیکه

کابل – د بهرنیو چارو وزارت سرپرست وزیر محمد حنیف اتمر د آذربایجان د بهرنیو چارو وزیر ښاغلي المار محمد یاروف سره ټیلیفوني خبرې وکړې.

په دې ټیلیفوني خبرو کې دواړو لوریو په یو لړ مهمو موضوعاتو له هغې جملې، د افغانستان، ترکمنستان او آذربایجان تر منځ د درې اړخیزه غونډې جوړول، د لاجوردو لارې د هوکړه لیک په چوکاټ کې د دوه اړخیزو او څو اړخیزو همکاریو د پراختیا پر څرنګوالي، همدارنګه د دواړو هېوادونو تر منځ د سیاسي او اقتصادي اړیکو د لا ډیرې پیاوړتیا پر مسئلو، بحث وشو او دواړو لوریو خپل نظرونه سره شریک کړل.

د آذربایجان د بهرنیو چارو وزیر له افغانستان سره د کوییډ ۱۹ ناروغۍ د مبارزې په لار کې د هغه هېواد د روغتیایي مرستو په اړه وویل: “په پام کې ده چې سبا د آذربایجان له لوري پر روغتیایي توکو بار یوه الوتکه افغانستان ته را ورسیږي.”

Go to top