جمعه ۱۵ حوت ۱۳۹۹، ۰۵:۰۲ پس از چاشت به وقت محلی کابل
وروستي خبرونه

وروستي خبرونه (574)

بهرنیو چارو وزیر د افغانستان لپاره د متحده ایالاتو له ځانګړي استازي سره وکتل

کابل - د افغانستان اسلامي جمهوریت د بهرنیو چارو وزیر، ښاغلي محمد حنیف اتمر نن د افغانستان د سولې لپاره د متحده ایالاتو د بهرنیو چارو وزارت له ځانګړي استازي، ښاغلي زلمي خلیلزاد سره وکتل.

د لیدنې په ترڅ کې، دواړو لورو د افغانستان د سولې په بهیر کې وروستي پرمختګونه او ننګونې او د واشنګټن لخوا د طالبانو د ژمنو د بیاکتنې په اړه خبرې وکړې او د سولې خبرو اترو د بریا لپاره، د واشنګټن او کابل په ګډو هڅو هم بحث وکړي.

بهرنیو چارو وزیر افغانستان ته د ښاغلي خلیلزاد د سفر په هرکلي سره، په افغانستان کې د روان کړکیچ د سوله ییز حل موندلو لپاره د افغانستان او متحده ایالاتو د ګډو هڅو ستاینه وکړه او د سولې بهیر لپاره د سیمه ییز او نړیوال ملاتړ پر اهمیت ټینګار وکړ.

پدې کتنه کې، ښاغلي خلیلزاد د افغانستان د سولې په بهیر کې د سیمې د هیوادونو رول مهم وباله او د افغانستان د سولې بهیر لپاره، په ځانګړي توګه د سیمه ایزې اجماع په رامینځته کولو او د نړیوالې اجماع د پیاوړتیا لپاره، د متحده ایالاتو د بشپړ ملاتړ څخه د افغان لوري ته ډاډ ورکړ.

د بهرنیو چارو وزارت سیاسي معین د تاجکستان د فرهنګ له وزیرې سره وکتل

دوشنبه - بهرنیو چارو وزارت سیاسي معین، ښاغلي میرویس ناب د تاجکستان جمهوريت د فرهنګ له وزیرې میرمن زلفیه دولت‌زاده سره په پلازمېنه دوشنبه ښار کې وکتل.

په پیل کې، د بهرنیو چارو وزارت سیاسي معین د دوه دوستو هیوادونو ترمنځ د تاریخي، تمدني او کلتوري مشترکاتو په اړه خبرې وکړې او ټینګار یې وکړ چې دغه مشترکات د کوم بل نړیوال تړون نه هاخوا د کابل او دوشنبه اړیکې تعریف او تنظیم کوي.

ښاغلي ناب په دوشنبه کې د استانبول پروسې - آسیا زړه هیوادونو د نهمې غونډې په څنډه کې د فرهنګي برنامې په یادونې سره، د ملي کتابتونونو ترمنځ اړیکې ټینګول، د ګډو کلتوري غونډو جوړول، د ملګرتیا اتحادیو رامنځته کول، د ګډو کلتوري شخصیتونو درناوی او په تاجکستان کې د افغان محصلینو زیاتوالی د دواړو هیوادونو تر منځ د فرهنګي اړیکو پیاوړتیا او پراختیا لپاره مهم وباله او په دې برخه کې یې د دواړو هیوادونو د حکومتونو او خلکو د ګډو هڅو غوشتنکی سو.

په پاى کې اغلې دولت‌زاده د ښاغلي ناب د وړاندیزونو او نظریاتو څخه په هرکلي سره، د کابل او دوشنه ترمنځ د کلتوري اړیکو د ودې ورکولو او د ځوانانو لپاره د لا ډیر تحصیلي بورسونو برابرولو لپاره د خپل هېواد چمتووالي څخه د بهرنیو چارو وزارت معین ته ډاډ ورکړ.

د جاپان بهرنیو چارو وزیر په افغانستان کې هدفي وژنې وغندلې

کابل – د یوې تلیفوني اړیکه په ترڅ کې د افغانستان او جاپان د بهرنیو چارو وزیرانو د افغانستان د سولې بهیر، له افغانستان سره د جاپان مرستو په دوام، د مرستو اغیزمنتوب او له اداري فساد سره د مبارزې په اړه، د مرحوم تتسو ناکامورا د وژنې په اړه تحقیق او د دواړو دوستو هیوادونو تر منځ د دوه اړخیزې اړيکو د پراختیا په اړه خبرې وکړې.

د افغانستان اسلامي جمهوریت د بهرنیو چارو وزیر، ښاغلي محمد حنیف اتمر د جاپان هیواد د افغانستان یو باوري او سخاوتمند دوست وباله او د توکیو د مرستو له دوام څخه یې ستاینه وکړه. ښاغلي اتمر همداراز د طالبانو له خپل کړو ژمنو څخه د سرغړونې په ګډون، د سولې په بهیر کې د وروستي پرمختګونه له خپل جاپاني سیال سره شریک کړل. بهرنیو چارو وزیر همداشان د سولې خبرو د پراختیا او د خپلو مسؤلیتونه په پوره کولو کې د افغانستان اسلامي جمهوري دولت د ژمنتيا په اړه، د جاپان بهرنیو چارو وزیر ته معلومات ورکړل.

د خبرو په ترڅ کې، د جاپان د بهرنیو چارو وزیر، ښاغلي توشیمیتسو موتيګي  په افغانستان کې هدفي وژنې او موټر بم بریدونه وغندل او د تاوتریخوالي کمولو او د سولې په بهیر کې د پرمختګ غوښتنه وکړه. همداراز، ښاغلي موتيګي ښاغلي اتمر ته ډاډ ورکړ چې جاپان به تر ٢٠٢٤ زیږدیز کال پورې له افغانستان سره خپلې مرستې جاري ساتي او افغانستان سره به د کووید ١٩ ناروغي پر وړاندې په مبارزه کې همکاري وکړي.

ښاغلى موتيګي د مرستو د اغیزمنتوب په اړه رڼا واچوله او په دې برخه کې یې له فساد سره د مبارزې پر اهمیت ټینګار وکړ. د جاپان بهرنیو چارو وزیر د مرحوم تیتسو ناکامورا د وژنې په اړه د تحقیقاتو له امله له افغانستان نه هم مننه وکړه.

په پاي کې، دواړو لورو د دواړو دوستو هیوادونو تر منځ د دوه اړخیزو اړیکو پر پراختیا ټینګار وکړ.

د افغانستان اسلامي جمهوریت د بهرنیو چارو وزارت اعلامیه

کابل - د افغانستان اسلامي جمهوري دولت، د هېواد د اساسی قانون د احکامو او ارزښتونو په رڼا کې او د خپلو بین المللي مکلفیتونو سره سم، د بشري حقونو د ارزښتونو په دفاع، د بیان آزادۍ ته د وده ورکولو لپاره، د رسنیو په ساتنې او د ژورنالستانو د مصونیت لپاره ځان مکلف بولي. له همدې امله، موږ د جمال خاشقجى د وژنې ته رسیده ګۍ په اړه د څیړنو او هڅو هرکلی کوو.

د افغانستان اسلامي جمهوري دولت د جمال خاشقجى د وژنې د عاملینو محاکمه کولو لپاره د سعودي عربستان شاهي هېواد لخوا د ترسره شويو قانوني اقداماتو هرکلی کوي. سعودي عربستان د خپلو داخلي قوانینو او نړیوالو مکلفیتونو په رڼا کې د مرحوم خاشقجى د وژنې عاملینو د محاکمه کولو او پدې برخه کې د عدالت تامین څخه د ډاډ ترلاسه کولو لپاره پراخې هڅې کړي دي؛ موږ د دې هڅو قدرداني او ملاتړ کوو.

سربیره پردې، موږ د ترهګرۍ او افراطیت پروړاندې د مبارزې او د بشري حقونو په ساتنه کې د سعودي عربستان شاهي هېواد رول خورا مهم ګڼو.

د بهرنیو چارو وزارت سیاسي معین د تاجکستان د بهرنیو چارو له وزیر سره وکتل

دوشنبه - بهرنیو چارو وزارت سیاسي معین، ښاغلي میرویس ناب په پلازمینه دوشنبه کې د تاجکستان جمهوريت د بهرنیو چارو له وزیر، ښاغلي سراج الدین مهرالدین سره وکتل.

د بهرنیو چارو وزارت معین د استانبول پروسې - اسیا زړه هېوادونو د بهرنیو چارو وزیرانو د نهمې ناستې جوړیدل په اوسني حساس وضعیت کې خورا مهم وباله او د تيرو دوه لسيزو لاسته راوړنو د ساتلو ترڅنګ یې د سولې خبرو ته د افغان حکومت ژمنتیا باندې ټینګار وکړ. ښاغلي ناب همداراز با ثباته او ولسواکه افغانستان د سیمې د ثبات، امنیت او د مرکزي او سويلي آسیا هیوادونو اقتصادي پرمختګ لپاره مهم وباله.

په دې کتنه کې د تاجکستان بهرنیو چارو وزیر د استانبول پروسې - اسیا زړه هېوادونو د بهرنیو چارو وزیرانو نهمې ناستې ته د خپل هېواد چمتووالي په اړه ډاډ ورکړ او تاجکستان ته د جلالتمآب محمد اشرف غني راتلونکی سفر يې د دواړو دوستو او ورورڼو هیوادونو تر منځ د اړیکو د لا پراختیا لپاره یو ښه فرصت وګاڼه.

په پاي کې، د کابل او دوشنبه تر منځ دوستانه اړیکو ته په اشارې سره، ښاغلي مهرالدین دا هم وویل چې د تاجکستان د سولې په مذاکراتو کې د افغانستان د اسلامي جمهوریت د دریځ څخه ملاتړ کوي.

د افغانستان او تاجکستان د بهرنیو چارو وزارتونو د معينانو کتنه

دوشنبه - بهرنیو چارو وزارت سیاسي معین، ښاغلي میرویس ناب له خپل تاجکستاني سیال، ښاغلي خسرو ناظري سره د تاجکستان جمهوريت په پلازمینه دوشنبه ښار کې وکتل.

د کتنې په ترڅ کې، دواړو لورو د استانبول پروسې - آسیا زړه هېوادونو د بهرنیو چارو وزیرانو د نهمې ناستې لپاره د چمتووالي په اړه خبرې وکړې او دغه ناسته يې د افغانستان د سولې مذاکراتو د ملاتړ لپاره د سیمه ییزې او نړیوالې اجماع په پیاوړتیا کې مهمه وبلله.

د کتنې په ترڅ کې، د افغانستان او تاجکستان د بهرنیو چارو وزارتونو معينان د استانبول پروسې - آسیا زړه هېوادونو نهمې ناستې نه مخکې د کابل او دوشنبه ترمنځ د دوه اړخیزو موافقتنامو په نهایی کیدو باندې تينګار وکړ او د کابل - دوشنبه ترمنځ د ستراتیژیک تړون لاسلیک يې د دواړو هیوادونو د حکومتونو او خلکو ترمنځ د اړیکو په پراخولو کې مهم او ارزښتناک اقدامات وګنل.

بهرنیو چارو وزیر په فدراتيفې روسیې کې له میشتو افغانانو سره وکتل

مسکو -  پلازمېنې مسکو ته د خپل سفر په پای کې، د افغانستان اسلامي جمهوریت د بهرنیو چارو وزیر، ښاغلي محمد حنیف اتمر په فدراتيفې روسیې کې د میشتو افغانانو له استازو سره وکتل. په دې کتنه کې، ښاغلي اتمر مسکو ته د خپل سفر موخه او لاسته راوړنې له ګډونوالو سره شریکې کړې او د سولې په بهیر کې د وروستيو سیاسي پرمختګونو او لاسته راوړنو په اړه هغوی ته معلومات ورکړل.

ښاغلي اتمر د سیاسي اړیکو په پیاوړتیا، د فرهنګي همکاریو په پراختیا او د اقتصاد او سوداګرۍ په وده کې د افغان کډوالو او راستنیدونکو وګړو پر رول ټینګار وکړ.


د غونډې په ترڅ کې د بیلابیلو ډلو استازو د خپل ژوند او فعالیتونو په اړه خبرې وکړې او خپلې ستونزې یې په مختلفو برخو کې د بهرنیو چارو وزیر سره شریکې کړې.

په پاى کې ښاغلي اتمر ډاډ ورکړ چې د افغانستان سفارت او په هیواد کې دننه اړوندو بنسټونو سره په همغږۍ کې به راپورته شوې ټولې ستونزې حل شي.

د افغانستان او فدراتيفې روسیې ترمنځ د اقتصادي-سوداګرۍ همکاريو درېیمه ناسته جوړه شوه

مسکو - د افغانستان اسلامي جمهوریت د بهرنیو چارو وزیر، ښاغلي محمد حنیف اتمر د فدراتيفې روسیې د سوداګرۍ او صنایعو له مرستيال وزیر، ښاغلي الکساندر نیکلایویچ موروزوف سره د دواړو هیوادونو ترمنځ د اقتصادي او سوداګرۍ همکاریو په اړه ناسته درلوده. 


د ناستې په جریان کې، بهرنیو چارو وزیر څرګنده کړه چې د اقتصادي همکاریو پراختیا د دواړو هیوادونو تر منځ د اړیکو په پراختیا او په سیمه کې د همغږۍ په پیاوړي کولو کې کليدي رول لري او له همدې امله افغانستان غواړي چې له روسیې سره ګډې اقتصادي او سوداګریزې پروژې طرحه او پلي کړي. له همدې کبله دواړو لورو هوکړه وکړه چې په نږدې راتلونکي کې د روسیې او افغانستان ترمنځ د ګډ اقتصادي - سوداګرۍ کمیسیون دریمه ناسته ترسره شي او دواړه خواوې به د اقتصادي همکاریو په پلان کار وکړي.


د ناستې په ترڅ کې دواړه لورو د ریل پټلۍ په سکتور کې د همکاريو په هکله هم په مفصلې خبرې وکړې او روسیي لورې اعلان وکړ چې د روسیې دولتي ریل پټلۍ شرکت او همدارنګه روسیې خصوصي شرکتونه په افغانستان کې د ریل پټلۍ پراختیا کې همکارۍ او پانګونې ته چمتو دي.


ښاغلي اتمر د مزار - کابل - پیښور، تورغندۍ - هرات او امام نظر - آقينه په ګډون د ریل پټلیو پروژو ته په اشارې سره وویل چې د دې پروژو په پلي کیدو سره به روسیه د مرکزي آسیا او افغانستان له لارې سویلي آسیا سره ونښلول شي.


په پاي کې هوکړه وشوه چې د افغانستان د ریل پټلۍ چارواکي تخنیکي ډله به ډیر ژر د تجهیزاتو پیرلو او د کارمندانو د روزنې په ګډون د همکارۍ په اړه، د فدراتيفې روسیې هېواد ته سفر وکړي.

د روسیې د امنیت شورا منشي: امارت د منلو وړ ندی او دا له وخته مخکې ده چې د تور نوملړ څخه د طالبانو نومونه لرې شي

مسکو – د افغانستان اسلامي جمهوریت د بهرنیو چارو وزیر، ښاغلي محمد حنیف اتمر د فدراتيفې روسیې د امنیت شورا له منشي، ښاغلي نیکولای پاتروشیوف سره وکتل. په دې کتنه کې، د دواړو هیوادونو تر منځ د همکاريو په اړه، په ځانګړي ډول د سیاسي او امنیتي همکاریو برخو کې خبرې وکړې.

ښاغلي پاتروشیوف د افغانستان پلاوى ته د ښه راغلاست ویلو ترڅنګ، د روسیې او افغانستان تر منځ د ډیپلوماتیکو اړیکو سلمې کلیزې په درشل کې د ښاغلي اتمر سفر روسیې ته ارزښتناکه وبله او زیاته یې کړه چې روسیه په افغانستان کې د سولې بهیر او د سولې نه وروسته بيارغونې ته ځانګړی اهمیت ورکوي.

د فدراتیفې روسیې د چارواکو بلنې څخه د مننې په څرګندولو سره، بهرنوی چارو وزیر د دوست هېواد مشرتابه ته د افغانستان ولسمشر نیکې هیلې او پیغام وړاندې کړ او پر همدې بنست یې، د اړیکو پراختیا او د دواړو هېوادونو تر منځ د سیاسي، اقتصادي او کلتوري اړيکو د نوي فصل رامنځته کیدو غوښتنه وکړه.

د سولې له بهیر پورې اړوند، ښاغلي اتمر څرګنده کړه چې د افغانستان اسلامي جمهوري دولت تر شپږو زرو د ديرو طالب بندیانو د خوشې کولو په ګډون، خپل ټول مکلفیتونه سرته رسولي دي. د بهرنیو چارو وزیر زیاته کړه چې په همدې بهیر کې له طالبانو تمه کیده چې د خپلو ژمنې سره سم به تاوتریخوالی کم کړي، د اوربند په اړه خبرو ته کښېني، له ترهګرو ډلو سره اړیکې پرې کړي او د جګړې ډګر ته د خوشې شوي بندیانو بیرته ستنیدو مخه ونیسي؛ خو مګر طالبانو په ټولو څلورو يادې قضیو کې خپلې ژمنې مات کړې دي.

د غونډې په ترڅ کې، ښاغلي اتمر او ښاغلي پاترشیوف د جدي او معنی داره مذاکراتو پر پیل ټینګار وکړ او د افغانانو د ارادې پربنسټ يو هراړخیز سیاسي حل‌لارې ته د رسیدو غوښتنه وکړه. ښاغلي پاتروشیوف وویل چې د امارت بیرته ستنیدل د منلو وړ ندي او تر څو چې په مذاکراتو کې د پام وړ پرمختګ ترلاسه نه شي، د وخت څخه مخکې ده چې د طالبانو نومونه د ملګرو ملتونو د تعزیراتو له تور لست څخه لرې شي.

پدې ناسته کې، دواړو لورو د سیمه ییزو اغیزمنو هیوادونو په ګډون کې د افغانستان د سولې بهیر په اړه د سیمه ییزې اجماع لپاره د څو اړخیزو اړیکو او خبرو د زیاتوالي پر اهمیت ټینګار وکړ.

د غونډې په پاى کې، ښاغلي اتمر د فدراتيفې روسیې د امنیت شورا منشى ته د افغانستان د ملي امنیت د سلاکار ښاغلي حمدالله محب نیکې هیلې هم وړاندې کړې او وویل چې د دواړو هیوادونو د چارواکو ترمنځ د اړیکو زیاتوالی، په ځانګړي توګه د کويد ١٩ بندیزونو څخه وروسته، د دوه اړخیزو اړیکو او همکارۍ د زیاتولو لپاره خورا ارزښتناک دي.

روسیه د تش په نامه امارت د بیرته ستنیدو ملاتړ نه کوي

مسکو – د افغانستان اسلامي جمهوریت د بهرنیو چارو وزیر، ښاغلي محمد حنیف اتمر چې فدراتيفې روسیې ته د یوه لوړ پوړي پلاوي په مشری سفر کړى ده، له خپل روسي سیال، ښاغلي سیرګي لاوروف سره ولیدل. د غونډې په ترڅ کې، دواړو لورو د افغانستان او روسیې تر منځ د ډیپلوماتیکو اړیکو سلمې کلیزې ته په اشارې سره؛ په افغانستان کې د سولې لپاره د همکاريو په پياوړتيا او د سیاسي، اقتصادي او فرهنګي برخو کې یې د دوه اړخیزو اړیکو د پراختیا په اړه خبرې وکړې.


په دې کتنه کې ښاغلي اتمر د روسیې ولسمشر ښاغلي ولادیمیر پوتین ته د افغانستان د ولسمشر جلالتمآب محمد اشرف غنی پیغام ښاغلي لاوروف ته وسپاره او زیاته یې کړه چې د افغانستان ولسمشر غواړي په سیاسي، اقتصادي او فرهنګي برخو کې د دواړو حکومتونو تر منځ اړیکې پراختیا ومومي. ښاغلي اتمر د افغانستان د سولې بهیر لپاره د سیمه ایزې اجماع په پیاوړي کولو کې د روسیې رول خورا ارزښتناک وباله او په تیرو شلو کلونو کې یې د مسکو د همکارۍ له امله ستاينه وکړه.

وروسته، دواړو لوریو په سیمه کې د ترهګرۍ، افراطیت، د مخدره توکو قاچاق او د تنظیم شوي جرمونو پر وړاندې د مبارزې په برخه کې د دوه اړخیزو همکاریو باندې په تفصیل خبرې وکړې او د ترهګرۍ او مخدره توکو قاچاق سره د مبارزې لپاره، د ګډ پلان پر جوړولو ټینګار وکړي. همداراز، دواړو لوریو د ګډو اقتصادي پروژو په هکله هم خبرې وکړې او ټینګار یې وکړ چې د امنیت وده او اقتصادي همکاریو، د دوه اړخیزو اړیکو پیاوړتیا لپاره خورا مهم دي.

د غونډې په ترڅ کې، د افغانستان او روسیې د بهرنیو چارو وزیرانو د سولې بهیر د پرمختګ او د معنى لرونکي خبرو اترو په پيل باندې ټینګار وکړ. ښاغلي لاوروف وویل چې روسیه د "امارت" بیرته ستنیدو ملاتړ نه کوي او د دې لپاره چې د طالبانو نومونه د تور ليست څخه ووځي، باید د سولې په خبرو کې اړین پرمختګ راشي. ښاغلي لاوروف همداشان د افغانستان د سولې بهیر په پرمختګ کې د سیمې د هیوادونو پر رول هم ټینګار وکړ.

ښاغلي اتمر څرګنده کړه چې د افغانستان اسلامي جمهوري دولت د سولې په اړه خپلې ټولې ژمنې سرته رسولي او تمه لري چې طالبان به د دوی د بندیانو له خوشې کیدو وروسته، خپلې څلور بنسټیزې ژمنې پوره کړي.

همداراز، دواړو لوریو د اړیکو او همکاریو د پیاوړتیا لپاره د دوه اړخیزو او څو اړخیزو اړیکو په دوام او زیاتوالي باندې ټینګار او هوکړه وکړه چې د دوه اړخیزو همکاریو لپاره به په يوه هراړخیز پلان باندې کار وکړي.

له ناستې وروسته، د دواړو هیوادونو بهرنیو چارو وزیرانو د خبریالانو په شتون کې په یوه خبري غونډه کې د خپلو خبرو پایلې اعلان کړې.
په پای کې، د بهرنیو چارو وزیر ښاغلي محمد حنیف اتمر او ورسره مل پلاوي د دوی په ویاړ جوړه شوې میلمستیا کې ګډون وکړ او د روسیې د بهرنیو چارو وزیر او چارواکو له تودې میلمه پالنې څخه ستاينه وکړه.

د مسکو د بهرنیو اړیکو نړیوال انستیتوت کې د بهرنیو چارو وزیر وينا

مسکو - د افغانستان اسلامي جمهوریت د بهرنیو چارو وزیر، ښاغلی محمد حنیف اتمر چې د یوه لوړ پوړي پلاوي په مشری د فدراتيفې روسیې هیواد ته په رسمي سفر تللی ده، د مسکو په بهرنیو اړیکو نړیوال انستیتوت ( MGIMO) کې د ياد انستیتوت چارواکو او محصلینو یوې غونډې ته وینا وکړه.

په پيل کې، ښاغلي اتمر د امګیمو انستیتوت څخه چې ٧٨ کلنه اکادمیکه تاریخچه لري، د نړۍ یو له مخکښو تحصيلي او څیړنیزو مرکزونو په توګه ياد کړ او یادونه یې وکړه چې تر سلو ډیر افغان مشران او ډیپلوماتان له همدې انستیتوت څخه فارغ شوي دي. په خپلو خبرو کې، د هيواد بهرنیو چارو وزیر د دواړو هیوادونو ترمنځ تاریخي اړکې په څلورو اصلي محورونو کې تر بحث لاندې راوستلې، دا محورونه عبارت دي له: ١ - د دواړو هیوادونو اړیکې او تاریخي شتمنۍ په ځانګړې توګه د دولت او دولت تر منځ سل کلنۍ اړیکې، ٢ - ګډ ګواښونه او ګټې، ٣ - سوله او امنیت، ٤ - او د روسیې او افغانستان ترمنځ د سولې، امنیت او هوساینې لپاره د همکاريو نوی فصل په اړه، خبرې وکړې.

په خپلې وينا کې ښاغلي اتمر په وولسمې پیړۍ کې د مدرن افغانستان له رامنځته کیدو راهیسې، د روسیې او افغانستان اړیکې په پنځو مرحلو کې و ارزولې. هغه وویل چې یوازې د سړې جګړې له لوړو زورو ‌‌‌‌‌‌ډکې يوې دورې پرته، د څلورو نورو دورو په جریان کې، د تیرو شلو کلونو په ګډون، روسیه تل د افغانستان د دولت او خلکو تر څنګ دريدلې دې او د افغانستان په پرمختګ، سوکالۍ او هوساینې کې یې همکاري کړې. د بهرنیو چارو وزیر زیاته کړه چې د معاصر تاریخ سم درک، د دواړو هیوادونو ترمنځ د اوسنيو او راتلونکو اړیکو د پیاوړتیا لپاره خورا مهم دي.

د خپلې وینا په جریان کې، د بهرنیو چارو وزیر وویل چې: ١ - د تاوتریخوالي، افراطیت او ترهګرۍ پروړاندې مبارزه، ٢ - د مخدره توکو قاچاق او د سازمان شوي جرمونو مخنیوی، ٣ - د تاوتریخوالي لکبله د جبري کډوالۍ مخنیوی، ٤ - او د اقتصادي فرصتونو په وړاندې خنډونه لرې کول، د افغانستان او روسیې ترمنځ څلور ګډ ګواښونه دي چې دوامداره همکاریو ته اړتیا لري.

ښاغلي اتمر په افغانستان، سیمه او نړۍ کې د افراطيت او ترهګرو ډلو تر منځ د منظمو اړیکو په اړه په تفصیل سره خبرې وکړې او وویل چې د تاوتریخوالي، افراطیت او ترهګرۍ ګډ ګواښ سره په سیمه ییزه او نړیواله کچه د ګډې همکارۍ او همغږۍ پرته، زمونږ هسې نشي بریالي کیدای.

ښاغلي اتمر وویل چې د ترهګرۍ پروړاندې مبارزه، د سیمې او نړۍ د ټولو هیوادونو ترمنځ د یووالي ترټولو مهمه عنصر دی او سیاسي او جیوپولیټیکې ملاحظات باید د دې ګډ ګواښ په حل کولو کې خن‌‌‌‌‌‌ډ واقع نشي. هغه وویل چې د افغانستان اسلامي جمهوري دولت د سولې خبرو ته ژمن دی او که چیرې طالبان له ترهګرو ډلو سره اړیکې پرې کړي او د خلکو ارادې ته غاړه کیږدي، نو په افغانستان کې به تلپاتې سولې ته رسیدو کې هیڅ خنډ پاتې نشي.

د بهرنیو چارو وزیر وویل چې د ګواښونو، ګډو ګټو او فرصتونو په رڼا کې د افغانستان او روسیې د حکومتونو تر منځ اړیکې لا پیاوړې کیدو ته اړتیا لري. هغه وویل چې افغانستان د ترهګرۍ پروړاندې په مبارزه او د اقتصادي همکاریو په پراخېدو کې د سیمه ییزې او نړیوالې همکارۍ لپاره لاره هوارولو ته ژمن دی او پدې برخه کې د روسیې مهم رول ته درناوی لري.

ښاغلي اتمر د امنیت او اقتصادي ودې په برخو کې د افغانستان اسلامي جمهوریت د نه ترشا راګرځېدونکو لاسته راوړنو څخه یادونه وکړه او په هغې کې یې د ځوان رهبرۍ د نقش پر اهمیت ټینګار وکړ او د افغانستان د مخ په ودې نسل د پوهنې په برخه کې یې د روسیې په ګډون، د نړۍ له ټولو هیوادونو څخه مننه وکړه.

د استانبول پروسې د هیوادونو د سفیرانو ناسته

کابل - د استانبول پروسې - آسیا زړه هیوادونو د بهرنیو چارو وزیرانو د نهمې ناستې لپاره د چمتووالي په خاطر، نن د بهرنیو چارو وزارت په ستوري ماڼۍ کې د يادې پروسې د سفیرانو ناسته د بهرنیو چارو وزارت سیاسي معین او سرپرست، ښاغلي میرویس ناب او په کابل کې د تاجکستان جمهوریت سفیر، ښاغلي ډاکټر شریف سعدي په ګډه مشرۍ جوړه شوه.

په دي ناسته کې، ښاغلي ناب د طالبانو لخوا په افغان خلکو باندې د وروستي پرلپسې ترهګريزې بریدونو د غندنې لپاره، د استانبول پروسې - آسيا زړه هيوادونو څخه ستاینه وکړه او ياده پروسه یې د سولې د خبرو اترو په بهیر کې د سیمه ایزې اجماع په پیاوړتیا او په افغانستان او سیمه کې د ثبات تامينولو په برخه کې، یوه مهم میکانیزم وګاڼه.

د ناستې په ترڅ کې، ګدونوالو د استانبول پروسې - آسیا زړه هیوادونو د بهرنیو چارو وزیرانو نهمې ناستې لپاره د خپلو چمتووالي په اړه چې د ٢٠٢١ کال د مارچ ٢٩ مه څخه تر ٣٠ مه پورې د تاجکستان په پلازمینه دوشنبې ښار کې جوړيږي، مفصلې خبرې وکړې.

د افغانستان او اروپايي ټولنې ترمنځ د بشري حقونو، ښې حکومتوالۍ او کډوالۍ په اړه د ځانګړې کاري ډلې دریمه ناسته ترسره شوه

کابل - د بشري حقونو، ښې حکومتوالۍ او کډوالۍ په اړه د افغانستان او اروپايي ټولنې، د ځانګړې کاري ډلې دریمه ناسته د ویډیو کنفرانس له لارې د بهرنیو چارو وزارت سیاسي معین او سرپرست وزیر، ښاغلي میرویس ناب او آغلې پاولا پمپلونی، د اروپايي ټولنې د آسیا او اوقيانوسيه سیمې مرستیالې، په ګډه مشرۍ جوړ شوه.

په دې ويديو کنفرانس کې ښاغلي ناب د افغانستان په اړه د ژینوا ٢٠٢٠ په کنفرانس کې د افغانستان د نړیوالو همکارانو د قوي ژمنې څخه او د بشري حقونو د فعالینو، خبریالانو او د مدني ټولنې د غړو د هدفي وژنې په غندلو کې، د اروپايي ټولنې د وروستي دریځ نه ستاینه وکړه او اروپايي ټولنه يې په افغانستان کې د بشري حقونو په ساتنه او د سولې او ثبات په د ټنګښت لپاره اغیزمنه ملاتړه وبلله.

وروسته، آغلې پمپلونی د بشري حقونو، ښځو، ماشومانو، قومي اقلیتونو، کډوالۍ، ښه حکومتوالۍ، له اداري فساد سره مبارزه او متقابلې ځواب ورکونې اړوند مسایل د افغانستان او اروپایي اتحادیې په اړیکو کې د مهمو موضوعاتو څخه وبلل او د تاوتریخوالي زياتيدو، د بشري حقونو فعالینو، خبریالانو، د مدني ټولنې غړو او په ملکي وګړو باندې بریدونه، په کلکه وغندل.

همداراز آغلې پمپلونی د افغانستان لپاره د اروپايي اتحادیې پر قوي ملاتړ او په افغانستان کې د تیرو دوو لسیزو لاس ته راوړنو او ارزښتونو په ساتنې باندې ټینګار وکړ او د بهرنیو چارو وزارت معین ته یې په افغانستان کې د اروپايي اتحادیې د همکاریو د دوام په اړه، ډاډ ورکړ.

په دې ناسته کې د کورنیو چارو، د کار او ټولنیزو چارو، د اطلاعاتو او فرهنګ، د ښځو چارو، د عدلیې، د کډوالو او راستنیدونکو چارو، د سولې، د سیمه ییزو چارو خپلواکې ادارې، د افغانستان بانک، د ټاکنو خپلواک کمیسیون، د اداري اصلاحات او د بشري حقونو د وزارتونو او اداراتو معينانو او لوړپوړو استازو په اړوندو ادارو کې د بشري حقونو، ښې حکومتولۍ او کډوالۍ په برخو کې د خپلو اجراآتو په اړه، غونډې ته لنډ معلومات وړاندې کړل.

بهرنیو چارو وزیر مسکو ته روان شو

کابل - د افغانستان اسلامي جمهوریت د بهرنیو چارو وزیر محمد حنیف اتمر، نن چهارشنبې د فدراتیفې روسیې د بهرنیو چارو وزیر ښاغلي سرګى لاوروف په رسمي بلنه، د یوه درې ورځني سفر په ترڅ کې مسکو ته د یوه لوړ پوړي پلاوي په مشری سفر وکړ.

د سفر موخه د دوه اړخیزو اړیکو پیاوړتیا او د افغانستان د سولې بهیر په اړه، د سیمه ایزې او نړیوالې اجماع پیاوړې کول دي.

مسکو ته د خپل سفر په جریان کې، به ښاغلی اتمر د بهرنیو چارو له وزیر او د روسیې له یو شمیر لوړ پوړو چارواکو سره وګوري.

بهرنیو چارو وزارت سیاسي معین د افغانستان لپاره د سویس له غير استوګن سفیر سره وکتل

کابل - د بهرنیو چارو وزارت سیاسي معین ښاغلي میرویس ناب، په افغانستان کې د سویس له غير استوګن سفیر، ښاغلي بندیکت دسرجات سره د دوه اړخیزو او څو اړخیزو همکاریو په اړه، خبرې وکړې.

بهرنیو چارو وزارت معین د افغانستان په اړه د ژینو کنفرانس د کوربه توب له کبله او په ياد​​ کنفرانس کې د سویس له ملاتړ څخه له هغه هیواد نه مننه وکړه او د دوه اړخیزو همکاریو د لا پراختیا غوښتنه یې وکړه.

په دې کتنه کې ښاغلي ناب او ښاغلي دسرجات، د افغانستان سولې بهیر په اړه، په ملګرو ملتونو کې د همکاریو او د دواړو هیوادونو ترمنځ د اقتصادي برنامو د پیاوړتیا په څرنګوالي بحث وکړ.

د افغانستان او اوزبیکستان د بهرنیو چارو وزيرانو ليدنه

کابل – بهرنیو چارو وزیر، محمد حنیف اتمر د اوزبیکستان د بهرنیو چارو له وزیر، عبدالعزیز کاملوف او ورسره مل پلاوي سره چې د یوه رسمي سفر لپاره کابل ته راغلی وو، ولیدل. په دي کتنه کې دواړو لوریو په تاشکند کې د سیمه ایزو اړیکو نړيوالو کنفرانس په جوړولو، چې د افغانستان سولې لپاره د سیمه ایزې اجماع پياوړي کول او د دوه اړخیزو همکاریو لپاره د هراړخیز "عمل پلان" نهایی کولو په اړه به جوړیږي، خبرې وکړې.

ښاغلي کاملوف د رسمي بلنلیک په وړاندې کولو سره، بهرنیو چارو له وزیر ته بلنه ورکړه چې په تاشکند کې د "سویلي او مرکزي آسیا: سیمه ایزې اړیکې، فرصتونه او ننګونو" تر سرلیک لاندې په جوړیدونکي نړیواله کنفرانس کې برخه واخلي. ياد کنفرانس به د جولای په میاشت کې د سیمې او نړۍ د هیوادونو د مشرانو او بهرنیو چارو وزیرانو په کچه ترسره کيږې چې اوزبیکستان او افغانستان پکې مهم رول لوبوي.

ښاغلي اتمر خپل اوزبیکستاني سيال ته د ښه راغلاست په ويلو سره، د افغانستان اسلامي جمهوریت په چوکاټ کې د سولې بهیر د ملاتړ او د تيرو دوه لسیزو لاسته راوړنو خوندي کولو لپاره د سیمه ایزې اجماع په لا پیاوړي کولو کې د اوزبیکستان د حکومت او خلکو د همکارۍ ستاينه وکړه. ښاغلي کاملوف له جلالتمآب ولسمشر محمد اشرف غني سره د خپلو خبرو په پایلو خوښي څرګنده کړه او زیاته یې کړه چې اوزبیکستان د افغانستان د ولسمشر له نظرونه سره په بشپړه توګه همغږي لري. د اوزبیکستان بهرنیو چارو وزیر همدا شان هيله څرګنده کړه چې د سیمې د ټولو هیوادونو د ملاتړ په جلبولو سره به په افغانستان کې د سولې لپاره بشپړ اجماع رامنځته شي.

همداراز، د دوه اړخیزو همکاریو لپاره د لارې‌نقشه د بشپړولو او پلي کولو په اړه، د بهرنیو چارو وزیر وویل چې د دواړو هیوادونو تر منځ د ګډو پروژو پلي کولو لپاره جامع "د عمل پلان" د دواړو هیوادونو د ولسمشرانو د موافقې سره سم چمتو شي او باید په راتلونکو ورځو کې بشپړ او لاسلیک شي. دا عملی پلان به د سوداګرۍ، ترانزیت، کرنې، انرژۍ، کان کیندنې، او تعلیمي او فرهنګي همکاریو په برخو کې د مهمو پروژو پلي کولو ته لاره هواره کړي.

د مزار - کابل - پیښور د ريل پټلۍ پروژې پلي کیدل، د سرخان - پلخمري د ٥٠٠ کیلوواټو د بریښنا د لیږد پروژې د پلي کیدو ګړندۍ کول، د دوه اړخیزه سوداګرۍ حجم کې زیاتوالی راوړل، په ترمذ کې د آزاد سوداګريز زون رامنځته کول، د دواړو هیوادونو تر منځ د سوداګرۍ ترانسپورت وده، د سرخان دريا او ترمذ ولایت په سرحد کې د طبي او تحصیلي خدمتونو وړاندې کول، د افغانستان د کرهنیزو صادراتو ‌‌‌‌‌‌ډيرول، د هیواد په کانونو کې د پانګونې امکانات ارزيابي کول، د فرهنګي او هنري اثارو بيا ژوندي کول او د ګډو کلتوري میراثونو ساتنه، په دغه کاري پلان کې شامل وي.

د غونډې په پای کې، د اوزبیکستان بهرنیو چارو وزیر او ورسره مل پلاوي د بهرنیو چارو وزارت په ستوري ماڼۍ کې د دوی په ویاړ، جوړ شوي ضيافت کې ګډون وکړ.

بهرنيو چارو وزارت سیاسي معين په کابل کې د ترکيې جمهوريت له سفير سره وکتل

کابل - د بهرنیو چارو وزارت سیاسي معین، میرویس ناب په افغانستان کې د ترکیې د جمهوریت له سفیر، ښاغلي اوغوزخان ارطغرول سره د سیمه ییزو همکاریو او دوه اړخیزو اړیکو د پیاوړتیا په اړه خبرې وکړې.

په دې کتنه کې، د بهرنیو چارو وزارت معین او په کابل کې د ترکيې سفیر د دواړو هیوادونو ترمنځ د اقتصادي، سياسي او امنيتي همکاريو په پياوړتيا او د استانبول پروسې "آسیا زړه" هیوادونو د بهرنیو چارو وزیرانو په نهمې ناستې کې د ترکي چارواکو ګډون په اړه چې په نږدې راتلونکي کې به د تاجکستان او افغانستان په ګډ کوربه‌توب جوړيږي، خبرې وکړې.

بهرنیو چارو وزارت سیاسي معین د اروپايي اتحادیې له شاژدافير سره وکتل

کابل – د بهرنیو چارو وزارت سیاسي معین میرویس ناب، په کابل کې د اروپايي اتحادیې له شاژدافير، ښاغلي آرنوت پاولز سره د سیمه ایزې همکارۍ او د افغانستان د سولې د بهیر د پیاوړتیا په اړه، خبرې وکړې.

په دي کتنه کې، بهرنیو چارو وزارت معین او په کابل کې د اروپايي اتحادیې شاژدافير، د افغانستان د سولې بهیر د پياوړتيا او د استانبول پروسې "آسیا زړه" هیوادونو د بهرنیو چارو وزیرانو په نهمې ناستې کې د اروپايي اتحادیې د استازو د رول او ګ‌‌‌‌‌‌ډون په اړه چې په نږدې راتلونکي کې به د افغانستان او تاجکستان په ګډ کوربه توب جوړيږي، خبرې وکړې.

بهرنیو چارو وزارت سیاسي معین په کابل کې د هند له سفیر سره وکتل

کابل - بهرنیو چارو وزارت سیاسي معین میرویس ناب، په کابل کې د هند له سفیر ښاغلي رودریندرا تاندوم سره نن ماښام د بهرنیو چارو وزارت په ستوري مانۍ کې وکتل.

پدې کتنه کې، دواړو لورو په بیلابیلو برخو کې د دواړو هیوادونو ترمنځ د دوستانه اړیکو او همکاریو ته په اشارې سره؛ د دوه اړخیزو همکاریو په پیاوړتیا، د سولې بهیر، د سولې بهیر په ملاتړ کې د سیمه ایزې اجماع پر اهمیت او د استانبول پروسې "آسیا زړه" هیوادونو د بهرنیو چارو وزیرانو نهمې ناستې لپاره د چمتووالي په اړه چې په نږدې راتلونکي کې به د تاجکستان او افغانستان په ګډه کوربه توب جوړيږي، خبرې وکړې.

په کابل کې د هند سفیر استانبول پروسې "آسیا زړه" مهم بهیر وباله او د يادې پروسې د بهرنیو چارو وزیرانو په نهمې ناستې کې دخپل هیواد د ګډون څخه، د بهرنیو چارو وزارت سیاسي معین ته يې ډاډ ورکړ.

بهرنیو چارو وزارت سیاسي معین په کابل کې د متحده ایالاتو د سفارت له مرستيال سره وکتل

کابل – بهرنیو چارو وزارت سیاسي معین، ميرويس ناب نن ماسپښین په کابل کې د متحده ایالاتو د سفارت له مرستيال، ښاغلي جان مک‌کري سره وکتل.

ښاغلي ناب د افغانستان او متحده ایالاتو تر منځ ستراتیژیکو اړیکو ته په اشارې سره، هیله څرګنده کړه چې د متحده ایالاتو لخوا د دوحې هوکړه لیک بياکتنه به د سولې بهیر پرمختګ په برخه کې ګټور تمام شي او په افغانستان کې د سولې، ثبات او امنیت لامل شي.

د کتنې په ترڅ کې، دواړو لورو د کابل او واشنګټن ترمنځ د دوه اړخیزو اړیکو، د سولې بهیر په ملاتړ کې د سیمه‌ایزې اجماع پر اهمیت او د استانبول پروسې "آسیا زړه" هیوادونو د بهرنیو چارو وزیرانو نهمې ناستې لپاره د چمتووالي په اړه چې د روان کال د مارچ په آخر کې به د تاجکستان او افغانستان په ګډ کوربه توب جوړيږي، خبرې وکړې.

ښاغلي مک‌کري، سیاسي معین ته د افغانستان او د هغه هيواد د سولې بهیر لپاره د خپل هیواد د ملاتړ دوام څخه ډاډ ورکړ او زیاته یې کړه چې متحده ايالات به د استانبول پروسې "آسیا زړه" هیوادونو د بهرنیو چارو وزیرانو په نهمې ناستې کې ګډون وکړي.

بهرنیو چارو وزارت سیاسي معین په کابل کې د چین سفیر سره وکتل

کابل - بهرنیو چارو وزارت سیاسي معین، میرویس ناب په کابل کې د چین د خلکو جمهوریت له سفیر، ښاغلي وانګ یو سره د سیمه ییزو همکاریو د پیاوړتیا په اړه، وکتل.

په دې ناسته کې د بهرنیو چارو وزارت معین او په کابل کې د چین سفیر، د استانبول پروسې "آسیا زړه" هیوادونو د بهرنیو چارو وزیرانو نهمې ناستې لپاره د چمتووالي په اړه چې په نږدې راتلونکي کې به د تاجکستان جمهوريت په کوربه توب جوړيږي، خبرې وکړې.

د بهرنیو چارو وزارت سیاسي معین په کابل کې د پاکستان له سفیر سره وکتل

کابل – بهرنیو چارو وزارت سیاسي معین، میرویس ناب نن سهار په خپل دفتر کې د پاکستان اسلامي جمهوریت له سفیر، ښاغلي منصور احمد خان سره وکتل.

د بهرنیو چارو وزارت معین په بیلابیلو برخو کې د افغانستان او پاکستان ترمنځ د همکارۍ او سولې مذاکراتو لپاره یې د دغه هیواد ملاتړ د دې بهیر د بریا لپاره مهم وباله او هیله یې څرګنده کړه چې د ګډو هڅو له لارې به په افغانستان، پاکستان او سیمه کې ثبات او امنیت ووينو.

د غونډې په ترڅ کې، دواړو لورو د دوه اړخیزو همکاریو، د سولې د بهیر د ملاتړ، د استانبول پروسې "آسیا زړه" هیوادونو د بهرنیو چارو وزیرانو د نهمې ناستې لپاره چمتووالي باندې چې په نږدې راتلونکي کې به د تاجکستان جمهوریت په کوربه توب جوړيږي، خبرې وکړې.

په پاى کې، د پاکستان سفیر په مختلفو برخو کې د کابل او اسلام آباد ترمنځ د همکاريو پر اهمیت او د ستانبول پروسې "آسیا زړه" په تیرو غونډو کې د دغه هیواد فعاله ګډون یادونه وکړه او زیاته یې کړه چې اسلام آباد به په دې برخه کې د رسمي بلنې تر ترلاسه کولو وروسته، خپل لازمي چمتووالی به له افغانستان سره شریک کړي.

بهرنیو چارو وزیر د نړیوالو اړیکو څیړونکو او کارپوهانو سره وکتل

کابل – بهرنیو چارو وزیر، محمد حنیف اتمر د هیواد له یو شمیر نامتو څیړونکو، کارپوهانو او شنونکو سره وکتل ترڅو د سولې په برخه کې د وروستيو پرمختګونو او د ملي، سیمه ییز او نړیوالې اجماع پر رامنځته کولو په هکله خبرې وکړي.

غونډې ته په وینا کې د بهرنیو چارو وزیر څرګنده کړه چې د سیمې او نړۍ بانفوذه هیوادونه د تش په نامه "امارت" د نه راستنيدنو په اړه، د تروریزم پر وړاندې ګډې مبارزې ته دوام، د افغانستان سیاسي - اقتصادي او ټولنیزو لاسته راوړنو په خوندي کولو او د یوې داسې سیاسي حل لارې ته چې د خلکو د خپلواکۍ سره مطابقت ولري، توافق لري. ښاغلي اتمر زیاته کړه چې پدې مسائلو کې د سیمه ایزې او نړیوالې اجماع د ساتلو او پیاوړي کولو لپاره، د ملي اجماع شتون او پیاوړي کول خورا مهم دي.

د غونډې په ترڅ کې، کارپوهانو د ملي، سیمه ایزې او نړیوالې اجماع پر بیلابیلو اړخونو خبرې وکړې او د مهمو وړاندیزونه د مطرح کولو ترڅنګ، د ملي اجماع د پياوړي کولو پر اړتیا ټینګار وکړ.

په پاى کې ځینې ​​کارپوهانو د دندو د دقیق ویش، د سولې او بهرنۍ تګلارې لپاره د اړوندو ادارو ترمنځ د همغږۍ او اجماع رامنځ ته کولو؛ د ملي اجماع په پراخولو او د سیمه ایزې او نړیوالې اجماع په پیاوړي کولو کې خورا مهم عناصر وګڼل.

بهرنیو چارو وزیر په اسلامي هیوادونو کې له ميشت افغان سیاسي استازو سره خبرې وکړي

کابل –  بهرنیو چارو وزیر، محمد حنیف اتمر د پنجشنبې په ماښام د ویډیو کنفرانس له لارې په بهرنیو هېوادونو کې، د اسلامي هېوادونو په ګډون د افغانستان له سفيرانو او سياسي استازو سره خبرې وکړې. د غونډې په ترڅ کې، د طالیبانو لخوا د وینو تویولو په اړه د اسلامي نړۍ د مخ په زیاتیدونکې اجماع په اړه بحث وشو او په افغانستان کې د سولې بهير د پیاوړتیا او سیمه ایز ثبات لپاره، د اسلام-محوره ډیپلوماسۍ د پرمخ بیولو نورو ګامونو په اړه خبرې وشوې.

بهرنیو چارو وزیر د بیلابیلو هیوادونو دیني عالمانو او د نامتو اسلامي مرکزونو لخوا، په افغانستان کې د جګړې غندنه د سولې بهیر د پرمختګ لپاره مهمه وبلله او د افغانستان د سیاسي استازو له هڅو څخه یې مننه وکړه. ښاغلي اتمر د افغانستان سفیرانو او سياسي استازو ته د اسلامي ډیپلوماسۍ په وده کې هم لازیاتې لارښوونې وکړې.


همداراز، ښاغلي اتمر د افغانستان اقتصاد محوره بهرني سیاست ته په اشارې سره، د هیواد سفیرانو او جنرال قونسلانو ته د سولې بهیر د بریالیتوب لپاره د هڅو سربیره، د نړۍ له نورو هیوادونو سره د اقتصادي او سوداګریزو اړیکو د پیاوړتیا او پراختیا ته د پاملرنې لپاره، مکلف وبلل. بهرنیو چارو وزیر همدارنګه مختلفو هیوادونو ته د افغاني توکو د صادراتو زیاتوالي او د بهرنۍ پانګوونې د راجلبولو لپاره، د هیواد سیاسي استازو ته په بهر کې لازمي مشورې ورکړې.

وروسته د افغانستان اسلامي جمهوریت سفیرانو او استازو د يادو موضوعاتو په اړه خپلې برنامې د بهرنیو چارو له وزیر سره شریکې کړې.

په پاى کې ښاغلي اتمر د وړاندې شويو برنامو په ستاينې سره لارښوونه وکړه چې د اړوندو برنامو پلي کیدو په لړ کې ژر تر ژره ځانګړي کاري پلانونه چمتو او مرکز ته د کتنې او نهایي کیدلو په موخه ولیږل شي.

د فدارتیفې روسیې د ځانګړي استازي وروستيو څرګندونو په اړه د رسنیو پوښتنو په ځواب کې د بهرنیو چارو وزارت د ویاند دفتر څرګندونې

کابل - فدراتیفه روسیه د افغانستان اسلامي جمهوریت ملګری هيواد او همکار دې چې له تیرو ٢٠ کلونو راهیسې یې د ترهګرۍ او مخدره توکو پروړاندې په مبارزه کې زموږ د حکومت او خلکو سره مرسته کړې او زموږ د هیواد په بیا ودانولو کې یې مهم رول لوبولي دې. د افغانستان حکومت له فدارتیفې روسیې څخه د دوی د ریښتینې مرستې لپاره تل مننه کړې او موږ همداراز ټینګار کوو چې دواړه هیوادونه د ترهګرۍ او مخدره توکو پروړاندې مبارزه کې، د ګډو ګټو ساتلو لپاره، د سولې او ثبات او سیمه ایزې اقتصادي اړیکو لپاره رغنده او اوږد مهاله همکاریو ته ژمن دي.

د همدې ګډو ګټو پر بنسټ ده چې موږ تل د روسیې له اصولي دریځ څخه د تش په نامه "امارت" د بیارغولو او د طالیبانو پر وړاندې د ملګرو ملتونو د بندیزونو لرې کولو سره د مخالفت په اړه، د سولې د خبرو اترو پیل، د تاوتریخوالي کمولو او د افغانانو هیلو سره سم د هراړخیز سیاسي حل لپاره بنسټیز لارې چارې موندل په اړه چې د ښاغلي ضمیر کابلوف په مرکه کې هم ورته اشاره شوې ده، هرکلی کوو.

مګر د ښاغلي ضمیر کابلوف وروستي څرګندونې د افغانستان له اوسنيو واقعیتونو سره سمون نه لري او په ډيرو مسايلو کې د روسیې د ملګري او متحد هيواد د رسمي اعلاميو سره په مخالفت کې دي چې په لاندي ډول ورته اشاره کيږې:

په روسیه کې د يوې "منع ګرځيدلې ډلې" غير معقول غټ ښودل په حقیقت کې په سیمه کې د افراطیت او ترهګرۍ له ګواښونو سره په مبارزه کې او د افغانستان د خلکو د ارادې پر بنسټ د تلپاتې سولې د ترلاسه کولو لپاره د روسیې له غوښتنې سره په ښکاره ټکر کې دی چې پایلې د روسیې او افغانستان د ګډو ګټو سره سمون نه لري.

د افغانستان حکومت د ملګرو ملتونو رسمي غړی دی او د روسیې فدراسیون په ګډون له ټولو هیوادونو سره ډیپلوماټیکې اړیکې لري او د یوه مسؤل حکومت په توګه، خپل ټول نړیوال مکلفیتونه ترسره کوي. نو د افغانستان په شان د یوه حکومت برابرول له یوې داسې ډلې سره چې د خپلو خلکو د ډله ایزې وژنې له لارې د واک ترلاسه کولو په لټه کې دی، په ښکاره ډول له نړیوالې ترهګرۍ ډلو سره همکاري کوي، په روسیه کې د منع شوې ترهګرې ډلې په توګه پيژندل شوې ده او د ملګرو ملتونو د امنیت شورا بندیزونو سره مخ دی، ممکن نه ده.  

د ښاغلي کابلوف د ادعاو پر خلاف، افغان حکومت هیڅکله هم د سولې خبرې نه دي ځنډولي بلکه دا طالیبان و چې د مذاکرې میز یې پریښود. د افغانستان حکومت د افغانانو د سوله پالنې ارادې پراساس او نړیوالې ټولنې سره د طالیبانو د ژمنې پربنسټ؛ له شپږو زرو څخه ډیر طالیب بندیان يې خوشې کړل ترڅو خبرو ته لاره هواره کړي. د خبرو اترو د پیل او پرمختګ لپاره د ښه نیت ښودلو لپاره د دې شمیر بندیانو خوشې کول بې ساري دي. طالیبانو ژمنه کړې وه چې خوشې شوي بندیان به هیڅکله د جګړې ډګر ته نه ستنیږي او دا چې طالیبان به په ښه نیت سره خبرې پیل کړي او په اوربند باندې به وغږیږي. اوس نو دا روښانه ده چې دا طالیبان دي چې له ژمنو څخه سرغړونه کړې، نه د افغان حکومت.

ښاغلي کابلوف دا هم وویل چې طالیبانو له متحده ایالاتو سره په خپلې هوکړو باندې پرته له کوم عيب او سرغړونې ولاړ دي؛ خو دا پداسې حال کې ده چې نړۍ ښه پوهېږي چې طالیبان خپل څلورو لویو ژمنو: (١) له ترهګرو سره اړیکې پرې کول، (٢) د تاوتریخوالي کمول، (٣) د معنی لرونکو مذاکراتو پیل، (4) او د جګړې ډګر ته د خوشې شوي جنګیالي نه راستنول، څخه په روښانه ډول سرغړونې کړې دي.

موږ د افغانستان د خاورې د درییو برخو د کنټرول په اړه د ښاغلي کابلوف څرګندونې هم ناسمې بولو. په بیلابیلو سیمو کې د ترهګریزو بریدونو ترسره کول او د خلکو وژل د دې معنی نه لري چې پدې سیمو کې دوى کنټرول ولري.

همداراز، د ښاغلي کابلوف لخوا د "انتقالي ایتلافي حکومت" د رامنځته کېدو وړاندېز، په کلکه د هغه څه مخالفت کې ده چې ښاغلي کابلوف په خپله همدې مرکه کې د افغانستان د ځان بسیاینې په تړاو او د افغانستان راتلونکې به خپله افغانانو ته د پريښودلو په هکله وویل. د افغانستان د دولت دریځ دا دی چې زموږ خلک حق او ځواک لري چې د هیواد د اساسي قانون سره سم، د ټاکنو او خلکو د آزادې ارادې له لارې د خپل حکومت برخلیک وټاکي.

د ښاغلي کابلوف په څرګندونو کې بل تضاد دا دی چې له یوې خوا هغه طالیبان "ملي" او کورنۍ ډله ګنې او له بلې خوا هغه وايي چې پاکستان "طالیبانو سره ملاتړ کوي او هغوی ته پناه ورکړې ده."

په پای کې، موږ په سیمه ایزو مسئلو کې د روسیې پر مهم رول ټینګار کوو او زموږ د ګډو ګټو او ګډې سیمه ایزو موخو د ترلاسه کولو لپاره، د دواړو هیوادونو ترمنځ د همکاریو د دوام غوښتونکي يو. په ورته وخت کې، موږ غواړو د ډیپلوماتیکو اړیکو او د لا ډېرو خبرو اترو له لارې د دواړو هیوادونو تر منځ د وضعیت په اړه ګډه پوهه او د همکاريو مؤثریت، پیاوړې کړو.

د بهرنیو چارو وزارت سیاسي معین په کابل کې د چین سفیر حضور ته ومانه

کابل - بهرنیو چارو وزارت سیاسي معین، ښاغلي میرویس ناب په کابل کې د چین د خلکو جمهوریت سفیر، ښاغلي وانګ یو سره د سولې بهير او دوه اړخیزو همکاریو د پیاوړتیا په اړه خبرې وکړې.

سیاسي معین د چین وروستي ملاتړ، په ځانګړي توګه د کوویډ - ١٩ واکسین د مرستې څخه ستاینه وکړه او افغانستان ته يې د ليږدولو د څرنګوالي په اړه خبرې وکړې.

ښاغلي ناب په سیمه ایزه اجماع کې د افغانستان د سولې له بهیر څخه د چین نقش اهمیت په اشارې سره، په دې اړه د چین د لا ډیر فعال رول غوښتنه وکړه.

د غونډې په ترڅ کې ښاغلي یو د افغانستان د سولې په بهیر کې د سيمه ايزې اجماع د پياوړتيا لپاره د چين د حکومت د ملاتړ په اړه د بهرنیو چارو وزارت معين ته ډاډ ورکړ او ټينګار يې وکړ چې په افغانستان کې سوله د سيمې ثبات پياوړی کوي.

په پای کې، دواړو لورو د اقتصادي همکاریو پر پیاوړتیا او د افغانستان لپاره د چین د تحصيلي بورسونو پر زیاتوالي هم بحث وکړ.

د ایران بهرنیو چارو وزارت معین سره د افغانستان د بهرنیو چارو وزارت د سیاسي معین خبرې

کابل – بهرنیو چارو وزارت سیاسي معین، ښاغلي میرویس ناب د خپل ایراني سیال، ښاغلي سید عباس عراقچي سره د ویډیو کنفرانس له لارې خبرې وکړې.

ښاغلي ناب د اسلام کلا په ګمرک کې د اوروژنې لکبله د ایران د اسلامي جمهوریت له مرستو څخه ستاینه وکړه او د دوه اړخیزو همکاریو پر پیاوړتیا یې ټینګار وکړ.

ښاغلي عراقچي په اسلام کلا ګمرک کې د اور لګیدنې او د هغه له امله د اوښتو زیانونو په اړه خپله خواشیني څرګنده کړه او زیاته یې کړه چې د دغه اور په وژلو کې د ايران مرستې، د يو ګاونډي هیواد دنده و.

پدې ویډیو کنفرانس کې، دواړو لورو په بیلابیلو برخو کې د دوه اړخیزو همکاریو پر پیاوړتیا او پراختیا باندې بحث وکړ او د جامع ستراتیژیکو همکاریو تړون د وروستي متن په چمتو کولو کې د دواړو هیوادونو د بهرنیو چارو وزارتونو د ګډې کاري کمیټې کار وستایه.

په پاى کې دواړه لورو د افغانستان د سولې خبرو او په دې هکله د دواړو هیوادونو پر ګډ لیدلوري باندې هم نظرونه تبادله وکړل.

بهرنیو چارو وزیر په افغانستان کې دناټو له ملکي استازي سره وکتل

کابل - د بهرنیو چارو وزیر، ښاغلي محمد حنیف اتمر په افغانستان کې د ناټو له ملکي استازي، ښاغلي اسټفانو پونټه‌کورو سره وکتل.

په پیل کې، بهرنیو چارو وزیر په افغانستان کې د ناټو دوامداره همکاریو او ژمنو څخه ستاينه وکړه او د افغانستان حکومت او امنیتي ځواکونو لپاره یې د ياد سازمان د ملاتړ پر اهمیت ټینګار او د ناتو په ګډون د افغانستان او نړیوالو ملګرو ترمنځ د لا همغږۍ پر اهمیت خبرې وکړې.

بهرنیو چارو وزیر همداراز د افغانستان د سولې بهیر په اړه د ناټو وروستۍ اعلاميې څخه ستاینه وکړه او د طالبانو د ژمنو د پوره کولو د اهميت په اړه، د ناټو د عمومي منشي د وروستیو څرګندونو او د دغه سازمان د "شرایطو پر بنسټ" دريځ څخه هرکلی وکړ.

د ناستې په ترڅ کې دواړو لورو د ناټو د دفاع وزیرانو د ناستې، د افغانستان اسلامي جمهوریت او طالبانو تر منځ د مذاکراتو د دوام په څرنګوالي، د سیمه ایزې ډیپلوماسۍ په اهمیت، د سولې بهیر په ملاتړ کې د دیني دیپلوماسۍ رول او د افغانستان او ناټو تر منځ د مشورې او لا ښې همکارۍ د څرنګوالي په اړه بحث او خبرې وکړې.

په پاى کې د افغانستان لپاره د ناټو ملکي استازي، د افغانستان له امنیتي او دفاعي ځواکونو سره د دې سازمان د ملاتړ او د همکاريو د دوام په هکله بهرنیو چارو وزیر ته ډاډ ورکړ.

په کابل کې د آلمان د سفارت له شاژدافیر سره د بهرنیو چارو وزارت د سیاسي معین ليدنه

کابل - د بهرنیو چارو وزارت سیاسي معین، میرویس ناب په کابل کې د آلمان د سفارت له شاژدافير، ښاغلي ګريګوري بليد جيان سره ولیدل او د دوه اړخیزو اړیکو د بنسټونو پیاوړتیا او د افغانستان سولې د بهیر په اړه خبرې وکړي.

ښاغلي ناب په کابل کې د آلمان د فدرالي جمهوریت شاژدافير ته د امنيتي، نظامي، روغتيايي، کلتوري او پراختیايي برخو کې له افغانستان سره د آلمان د سخاوتمندانه مرستو له امله، د افغانستان د خلکو او حکومت مننه څرګنده کړه او په افغانستان کې د ناتو د ماموریت په چوکاټ کې د آلماني ځواکونو د ماموریت د دوام په هکله یې، د برلین د پریکړې هرکلی وکړ.

سیاسي معین په افغانستان کې د سولې د ملاتړ لپاره سیمه ایزې اجماع ته په اشارې سره وویل: "طالیبانو په سیمه کې د افراطیت پیغام خپور کړی او د سیمې هیوادونه امارت ته د نورو سیمه ایزو تروریستي ډلو د پیاوړتیا لپاره د يو ګواښ په سترګه ګوري، نو ځکه سيمه د افغانستان د اسلامي جمهوریت د نظام او خلکو سره ولاړ دي."

د ناستې په ترڅ کې ښاغلي بلید جيان د تاوتریخوالي او هدفي وژنو د زیاتیدو په اړه خپله ژوره اندیښنه څرګنده کړه او د افغانستان اسلامي جمهوریت د حکومت او خلکو په مشرۍ د سولې بهير او د بشري حقونو د شل کلنو لاسته راوړنو د ساتنې په اړه، د خپل حکومت د ملاتړ څخه د بهرنیو چارو سیاسي معین ته ډاډ ورکړ. نوموړي همداراز پر طالب وسله والو هم غږ وکړ چې د سولې بهیر سره يوځاى شي او اوربند ومني.

په پای کې، دواړو لوریو په ملګرو ملتونو په چوکاټ کې د دوه اړخیزو او څو اړخیزو اړیکو او همکاريو د پیاوړتیا په اړه هم خبرې وکړې.

بهرنیو چارو وزیر په کابل کې د ترکمنستان سفیر حضور ته ومانه

کابل – ښاغلي محمد حنیف اتمر نن د بهرنیو چارو وزارت په ستوري ماڼۍ کې د ترکمنستان سفیر، ښاغلي خواجه عوضوف حضور ته ومانه او د دوه اړخیزو اړیکو پر پراختیا او د دوحې د سولې خبرو په دوهم پړاو کې د وروستيو پرمختګونو په هکله خبرې وکړې.

ښاغلي اتمر د افغانستان سولې په بهیر کې د ترکمنستان حکومت رغنده رول او د اړیکو د پیاوړتیا څخه په ستاينه، وویل: "موږ ترکمنستان د خپل ګران ملګری او ورور هېواد په توګه ګنو او د دغه نيک ګاونډیو سره په ټولو برخو کې د اړیکو د ټینګښت او همکارۍ دوام غواړو."

ښاغلي عوضوف خپل هیواد ته د طالیبانو پلاوي د وروستي سفر په اړه بهرنیو چارو وزیر ته بشپړ معلومات ورکړل او همداراز په نږدې راتلونکې کې د ټاپي (TAPI) او ټپ (TAP) د پروژو او د تورغندي - هرات د ریل پټلۍ د پروژې د پيل څخه خبر ورکړ.

په کابل کې د ترکمنستان سفیر وویل: "په ورته وخت کې چې د ټاپي او ټپ پروژو د پلي کولو لپاره کار روان دی، د دواړو هیوادونو د ریل پټلۍ چارواکي په دي بحث کوي ترڅو د ننه په افغانستان کې د تورغونډۍ - هرات د ٢١ کلومیټره ریل پټلۍ پروژې کار پیل شي.

د بهرنیو چارو وزیر د یادې شوې پراختیایي او اقتصادي پروژو پلي کیدل په افغانستان کې د سولې خبرو او د تاوتریخوالي د پای ته رسولو لپاره یو مهم او اغیزناک عنصر وباله او د دې پروژو تطبیق یې په سمیه ایز ثبات او اقتصادي پیاوړتیا په اړه مهم وباله.

Go to top