کابل – د بهرنیو چارو سرپرست وزیر جلالتمآب ادریس زمان د PS752 د الوتکې د سقوط قربانیانو کورنیو لپاره د نړیوالې همغږۍ او غبرګون ډلې د تشکیلیدلو طرحه چې د کاناډا لخوا جوړه شوې، تائید کړه.

ښاغلي زمان د کاناډا د بهرنیو چارو وزیر ښاغلي فرانسوا – فیلیپ شامپاین او د نورو هغو هېوادونو د بهرنیو چارو وزیرانو سره چې په ایران کې د اوکرایني الوتکې د راغورځېدو له پيښې اغیزمن شوي، ګډې ټیلیفوني خبرې اترې وکړې. دوی هوکړه وکړه چې د قربانیانو کورنیو لپاره به د نړیوالې همغږۍ او غبرګون ډله رامنځ ته کړي. 

ټولو ګډون کوونکو هېوادونو د الوتکې د راغورځېدو د لاملونو په تړاو د بشپړې او شفافې پلټنې پر اړتیا ټینګار وکړ تر څو د قربانیانو کورنۍ او دوستان هغه ځوابونه ترلاسه کړي چې دوی يې مستحق دي. دوی همداراز هوکړه وکړه چې په راتلونکو ورځو او اونیو کې به خپلو نږدې اړیکو او ګډ کار او همداراز د دغه غمجنې پېښې د شفافیت او حساب ورکړې ډاډمنولو په موخه له نورو نړیوالو همکارانو سره هم خبرو اترو ته دوام ورکوي.

د پيښې په اړه د ایران حکومت د وروستي اعلان پر بنسټ، مونږ په ټولو هغو هېوادونو چې له دغه پیښې اغیزمن شوي غږ کوو چې د شفافیت او حساب ورکړې ډاډمنولو او همداراز د قربانیانو کورنیو ته د اړینو مالوماتو او مرستې وړاندې کولو په موخه د همغږۍ ساحه پراخه او له نږدې په اړیکه کې پاتې شي.

کابل – د اساسی قانون د کالیزې د لمانځنې اونۍ په درشل کې، د بهرنیو چارو وزارت یاده کلیزه د یوې پرتمینې غونډې په ترڅ کې د بهرنیو چارو وزارت د تشریفات په سالون کې ولمانځله.

په دې لمانځغونډه کې د بهرنیو چارو وزارت سرپرست ښاغلې ادریس زمان، د اساسې قانون پر تطبیق د څارنې خپلواک کمیسیون رئیس ښاغلې محمد قاسم هاشمزی، د ملې شورا د دواړو خونو د نړیوالو اړیکو کمیسیونونو رئیسان، د یو شمیر وزارتخانو او خپلواکو ادارو استازو او د بهرنیو چارو وزارت کارکونکو ګډون کړی و.

وینا کوونکو د اساسې قانون پر تاریخ رڼا واچوله او په ټولنه کې د اساسې قانون پر حاکمیت، اهمیت او له قانون څخه د خلکو متابعت په اړه په تفصیلي توګه وغیږیدل.

حیدر آباد –  د هندوستان په حيدرآباد ښار کې نوې افغان جنرال قونسلګري پرانيستل سوه.

د افغانستان اسلامي جمهوريت د جلالتمآب ولسمشر له لارښوونې سره سم، نن د هندوستان د تلنګانه او اندراپردېش ايالتونو په ګډ مرکز-حيدرآباد- کې د افغانستان اسلامي جمهوريت جنرال قونسلګري د بهرنيو چارو وزارت د ادارې او سرچينو مرستيالۍ آغلې ناهيد ايثار او د تلنګانه ايالت د کورنيو چارو، محابسو او اوروژنې د خدماتو د وزير ښاغلي محمد محمود علي لخوا پرانيستل سوه.

د دې قونسلګرۍ د پرانيستنې موخه په سهيلي هند کې د سوداګرۍ او اقتصاد له فرصتونو څخه د هيواد د ښېرازۍ په موخه غوره ګټه آخیستنې؛ د افغانستان او سويلي هند تر منځ د سوداګرۍ لا پراخیدا او هلته مېشتو افغانانو ته د اړينو چوپړونو په ښه ډول ترسره کول دي.

د نوۍ افغان جنرال قونسلګرۍ په پرانيستني سره په هند کي د هيواد د سياسي او قونسلي استازوليو شمېر دريو ته لوړ سو.

همدغه راز د بهرنیو چارو وزارت د اداري او سرچېنو معینې چې هند ته د دې قونسولګرۍ د پرانیتسو لپاره هند ته تللې، د تلنګانه ایالت والي آغلې تمیلی سای سوندرا راجان سره د هغوی په دفتر کې په توګه ولیدل. دواړو لورو د نوی افغان جنرال قونسلګرۍ پرانیسته د سویلي هند او افغانستان د لا نږدیوالي په پار یو اړین او ارزشتمن ګام وباله او هغه ېې د دواړو هېوادونو ترمنځ د سوداګرۍ د لا پراخیدا او په افغانستان کې ېې د هندی پانګونې جلبولو لپاره یوه ښه پيلامه وبلله.

کابل – د ا. ا. ج. د بهرنیو چارو وزارت سرپرست وزیر ښاغلي ادریس زمان پرون ماښام د ګډو ګټو، ملګرو ملتونو او سوېلي آسیا په برخه کې د برېټانیا د بهرنیو چارو وزیر ښاغلي لارد احمد سره ټلیفوني خبرې وکړې.

دواړو خواوو په سیمه کې د وروستیو کړکېچونو د زیاتېدو په تړاو خپلې اندېښنې څرګندې کړې او ټینګار یې وکړ، څرنګه چې په سیمه کې حالات مخ په خرابېدو دي نو هر ډول هڅې باید وشي ترڅو نه یوازې فشارونه کم شي بلکه په افغانستان باندې يې د احتمالي منفې اغېز څخه هم مخنیوی وشي.

په پای کې ښاغلي زمان، افغانستان سره د برېټانیا د دوامداره ملاتړ په پار، له ښاغلي احمد څخه مننه وکړه او هیله يې څرګنده کړه چې په ۲۰۲۰ زېږدیز کال کې د دواړو هېوادونو ترمنځ دوه اړخیزې اړیکې لا پیاوړې شي.

کابل – د افغانستان اسلامي جمهوریت د بهرنیو چارو سرپرست وزیر ښاغلي ادریس زمان او د دې وزارت د اقتصادي همکاریو معین ښاغلي میرویس ناب، نن په بهرنیو چارو وزارت کې، په یوې خبرې ناسته کې، د اصلاحاتو د هراړخیزی ټولګې په تړاو او په تېره بیا په لاندی څلورګونو محورونو باندې په تفصیل خبرې وکړې:

نوموړی اصلاحی ټولګه څلور اساسی محورونه لري: د بهرنی سیاست د اډانې او په بهر کې د سیاسي او قونسولي نمایندګیو متحول کول، د استخدام، ارتقاء، مکافاتو او مجازاتو د توګی او طریقی متحول کول او د استخدام بهیر قانوني کول، د کاري پروسو او د مالوماتي ټېکنالوجۍ د بیخبنا متحول کول او قونسولي خدماتو لپاره د اسانتیاو رامنخ ته کول.

د بهرنیو چارو وزارت د اصلاحی ټولګې طرحې، د اداري اصلاحاتو او ملکی خدماتو کمیسیون، د ملي شورا غړو، د مالېې محترم وزارت، د احصاېې لوی رئیس او د ملي تدارکاتو کمیسیون رئیس سره په سلامشوره او همغږی کې ترتیب شوې دي

د بهرنیو چارو سرپرست وزیر همدغه راز زیاته کړه، دغه اصلاحې ټولګه د اصلاحاتو او سمونونو له هلو ځلو سره په پرتلنه کې د بهرنیو چارو وزارت په کاري تاریخ کې مخینه نلري او د هېواد د بهرني سیاست  اډانې ټولو ستونځو ته رسیدګۍ لپاره لازم او اړین اقدامات رانغاړي. په پام کې ده چې د هغې په عملي کېدو سره د یوې بهتره، کارنده او اغیزمن بهرني سیاست اډانې رغولو شاهدان واوسو.

کابل – د بهرنیو چارو وزارت سرپرست ادریس زمان نن له غرمې مخکې د بریتانیا شاهي هیواد سفیرې او د فرانسی او جرمني سفارتونو له شارژدافیرانو سره ولېدل.

 پدې لېدنه کې ښاغلي زمان سره د بریتانیا، فرانسی او آلمان هېوادونو د استازو له خوا، هغه اعتراضی دیمارش مطرح شو چې د ایران له لورې د ګډ اقدام د جامع برنامی (برجام) د نقضولو په هکله د دریواړو هیوادونو د استازو لخوا ترتیب شوی وو.  دغه دیمارش د روسیې او ایران د بهرنیو چارو وزیرانو د غونډې په غبرګون کې، چې د ۲۰۱۹ کال د دسمبر په ۳۰ مه په مسکو کې جوړه شوې وه، د دې درېواړو هیوادونو لخوا ترتیب شو وو.

په پای کې ټولو لورو په سیمه کې حالاتو خرابیدو ته په کتو سره ایران دولت  له خوا د برجام  نه رعایت د احتمال په اړه  خپلې اندېښنې څرګندې کړې.

د افغانستان اسلامي جمهوریت د بهرنیو چارو سرپرست وزیر ادریس زمان، نن له غرمې مخکې په کابل کې استوګن د بریتانیا له سفیرې آغلي الېسون بلیک سره ولېدل.

په پیل کې دواړو لورو په سیمه کې د کړکېچ د زیاتېدو په اړه اندېښنې څرګندې کړې او د علاقې وړ موضوعګانو په اړه ېې بحث وکړ.

دواړو لورو همدغه راز په سیمه کې د راټوکیدونکي احتمالي کړکیچ په پار خپلو ملاحظاتو په اړه نظریېې سره تبادله کړې او هیله یې څرګنده کړه چې متنازع لوري په سیمه کې د بی ثباتۍ د رامنځته کېدو له هرډول بالقوه  اقدام څخه ډډه وکړي.

په ورته وخت کې، د بریتانیا سفیری د ۲۰۲۰کال د جنوری ۳۱، د بریګزیټ دمهالني جدول په اړه ښاغلي زمان ته مالومات وړاندې کړل او د بریګزیټ پروګرام پلې کولو لپاره ېې د علیا حضرتې د دولت تیاریو ته هم اشاره وکړه.

په پای کې، دواړو لورو هېله مندي څرګنده کړه چې دوه اړخیزې اړیکې، اروپايي ټولنې څخه د بریتانیا له وتلو وروسته، دوام او پراختیا ومومي.    

کابل – د بهرنیو چارو سرپرست وزیر جلالتمآب ادریس زمان نن ماښام په هغه غونډه کې ګډون وکړ چې د امریکا متحده ایالاتو سفیر ښاغلي جان بس د مخه ښې په پار جوړه شوې وه.

د بهرنیو چارو سرپرست وزیر په افغانستان کې د ښاغلي جان بس ماموریت په دوران کې د نوموړي خدمتونو په ستاینې سره یاده غونډه پرانیسته او نوموړي ته یې په راتلونکو چارو کې د بریا هېله څرګنده کړه.

ښاغلي زمان له افغانستان سره د متحده ایالاتو د مرستې او ملاتړ د ستاینې ترڅنګ د ښاغلي جان بس ماموریت د دواړو هېوادونو ترمنځ د دوه اړخیزو اړیکو او همکاریو د لاپیاوړتیا لپاره هیله بښونکی وباله.

ښاغلي جان بس د متحده ایالاتو د دولت له لوري د یوه سوله ییز، باثباته او نېکمرغه افغانستان لپاره د دوامداره همکاریو او ژمنو په اړه د بهرنیو چارو سرپرست وزیر ته ډاډ ورکړ.

کابل - د بهرنیو چارو سرپرست وزیر جلالتمآب ادریس زمان نن سهار د ملګرو ملتونو عمومي منشي له ځانګړي استازي ښاغلي تادامیچی یاماماتو سره وکتل.

دواړو خواوو د سولې او ولسمشریزو ټاکنو په ګډون پر یو شمېر مسایلو خپل نظریات شریک کړل.

ښاغلي یاماماتو د بهرنیو چارو وزیر ته د ولسمشریزو ټاکنو په بریالۍ توګه ترسره کېدو مبارکي ورکړه او له ٢٠۰۴ راهیسې یي دغه ټاکنې چې د افغانانو لخوا ترسره شوې تر ټولو شفافې او معتبرې ټاکنې وبللې.

د بهرنیو چارو وزير په افغانستان کې د ډيموکراتیک بهیر څخه د یوناما د ملاتړ له امله مننه وکړه او له ښاغلي یاماماتو سره یي د سولې اوه ماده ییز پلان په تړاو د افغانستان دولت د سولې لیدلوری شریک کړ.

په پای کې دواړو خواوو د سوکاله، باثباته او نیکمرغه افغانستان هيله څرګنده کړه.

کابل ـ د افغانستان اسلامي جمهوریت د بهرنیو چارو وزارت سرپرست جلالتمآب ادریس زمان، نن له غرمې وروسته، په افغانستان کې د نړیوال بانک رئیس ښاغلي هنري کرالي سره ولېدل.

 د لېدنې په پېل کې، د نړیوال بانک رئیس د استانبول ـ اسیا زړه پروسې په بریالی توګه دایرولو په خاطر د مبارکی ویلو په ترڅ کې لېوالتیا ښکاره کړه څو د استانبول ـ اسیا زړه پروسې د ملاتړي په توګه په راتلونکې کې فعاله ونډه واخلي چې په پرنسیپ کې د بهرنیو چارو وزیر په دې برخه هغه سره هوکړه او د همکاري یادونه وکړه.

جلالتمآب ادریس زمان له سولې څخه وروسته افغانستان کې د جګړه مارو د بېا ادغام، د شخړو د هواري او همدغه راز په سیمه کې د سوداګري او ترانزیټ په پراخېدا کې د نړیوال بانک د رول په تړاو مالومات وړاندې کړل.

همدغه شان بهرنیو چارو وزیر د افغانستان د مالي مرستندویانو دکنفرانس جوړولو په تړاو چې د راتلونکي میلادي کال په مني کې به جوړ شي په تفصیل  سره خبرې وکړې.

بیا وروسته د نړیوال بانک رئیس د پرمختیايي سلامشورو په برخه کې، د افغانستان د بیا رغونې صندوق پروګرامونو ته په کتو سره چې د نوي میلادي کال په لومړۍ میاشت کې به پېل او د افغانستان دولت له ټيکاومنو پرمختیايي موخو او د اقتصادي – پرمختیايي لومړیتوبونو سره سم به ترتیب شي، مالومات وړاندې کړل. او په دې برخه کې ېې بهرنیو چارو وزیر ته د دې بنسټ د چمتوالي په هکله ډاډ ورکړ.